Төрмәнән сыҡҡан кешеләргә яңы мөмкинлектәр

Республика һынау үҙәге республика картаһында яңы социаль объектҡа әйләнде. Ул элекке хөкөм ителеүселәрҙе йәмғиәткә яраҡлаштырыу мәсьәләләре менән шөғөлләнәсәк. Иркенән мәхрүм итеү урындарынан бушатылғандар бында бушлай психологик ярҙам, документтар тултырыуҙа ярҙам һәм түләүҙәр, һөнәри белем алыу һәм эшкә урынлашыу, социаль файҙалы бәйләнештәрҙе тергеҙеү һәм формалаштырыуҙа булышлыҡ итә аласаҡ. Яңы үҙәк Өфө ҡалаһы, Ҡулса урамы, 47Б йорто (элекке Өфө художество-гуманитар колледжы бинаһы) адресы буйынса урынлашҡан.

Үҙәкте асҡандан һуң Башҡортостан биләмәһендә "Рәсәй Федерацияһында һынауҙар тураһында"ғы Федераль закон положениеларын тормошҡа ашырыу буйынса махсус ведомство-ара комиссия етәксеһе, Башҡортостан Республикаһы Хөкүмәте Премьер-министры урынбаҫары - Башҡортостан Республикаһы Хөкүмәте Аппараты етәксеһе вазифаһын башҡарыусы Азамат Абдрахманов эш кәңәшмәһе үткәрҙе. Комиссия ағзалары сәләмәт йәмғиәткә ҡайтырға теләгән кешеләргә ярҙам итеү маршрутын, икенсе ярҙам варианттарын, был эшкә ҡыҙыҡһынған власть органдарын, белем биреү һәм йәмәғәт ойошмаларын йәлеп итеүҙе тикшерҙе. Хәтерегеҙгә төшөрәбеҙ, Башҡортостан һынау үҙәктәре булдырыу буйынса 11 пилот төбәктең береһе булды.

- Һынау үҙәгендә йыл һайын 40-ҡа яҡын кешегә ярҙам күрһәтеләсәк. Улар башлыса социаль бәйләнештәре тулыһынса юғалған һәм кире әйләнеп ҡайтыр урындары булмаған кешеләр. Бында улар 11 айға тиклем йәшәй ала, ошо ваҡыт эсендә уҡыу курсы үтергә йәки квалификацияларын күтәрергә, эшкә урынлашырға, торлаҡ табырға - бер һүҙ менән әйткәндә, ғәҙәти йәшәү рәүешенә инергә мөмкин. Һынау үҙәге республика бюджеты иҫәбенә эшләйәсәк, - тип һыҙыҡ өҫтөнә алды Азамат Абдрахманов һәм, Һынау үҙәген асыу заманса енәйәт-хоҡуҡ системаһын камиллаштырыуҙа ҙур аҙым буласаҡ, тип билдәләне.

Хәтерегеҙгә төшөрәбеҙ, илдә 2023 йылда һынау тураһында закон ҡабул ителде, ул ике этапта үҙ көсөнә инә. Ул азат ителгәндән һуң социаль ярҙам һәм психологик ярҙам күрһәтеү өсөн индивидуаль ресоциализация, социаль яраҡлашыу һәм реабилитация программаларын үҙ эсенә ала.

Республиканың мәшғүллек хеҙмәте лә иректән мәхрүм итеү урындарында яза алған кешеләр менән әүҙем эш алып бара. Рәсәй Федераль яза башҡарыу хеҙмәтенең Башҡортостан Республикаһы буйынса идаралығы менән килешеү сиктәрендә мәшғүллек үҙәктәре белгестәре ошо категорияға ҡараған эш эҙләүселәрҙе алдан анкета нигеҙендә һайлай башлай.

- Һынау үҙәге - кеше ресурстарын мобилизациялау, уны йәмғиәткә, хеҙмәт коллективтарына һәм ғаиләләргә әйләндереү өсөн мөһим звено ул, - тип билдәләне Башҡортостандың ғаилә, хеҙмәт һәм халыҡты социаль яҡлау министры вазифаһын башҡарыусы Ленара Иванова.

Фото: Башҡортостан Хөкүмәте сайты.