Иң шәп үҙәк ҡайҙа?

Быйыл конкурста ҡатнашыу өсөн бөтәһе 150, «Иң яҡшы күп функциялы дәүләт һәм муниципаль хеҙмәттәр күрһәтеү үҙәге» номинацияһында 74 һәм «Күп функциялы үҙәктең иң яҡшы белгесе» номинацияһында 76 ғариза тапшырылған.

Конкурс еңеүселәрен һәм лауреаттарын Рәхмәт хаттары һәм иҫтәлекле статуэткалар менән Башҡортостан Хөкүмәте Премьер-министры урынбаҫары - Хөкүмәт Аппараты етәксеһе Азамат Абдрахманов бүләкләне.

- Власть органдары менән яйға һалынған эш һөҙөмтәһендә күп функциялы үҙәк алдына ҡуйылған бөтә бурыстар ҙа сифатлы һәм ваҡытында үтәлә. Һеҙҙең көндәлек хеҙмәтегеҙ кешеләр менән бәйле, шуға күрә, һис шикһеҙ, һөнәрегеҙҙе яратмайынса һәм үҙ эшегеҙҙе еренә еткереп башҡарып булмай, - тип билдәләне ул сәләмләү һүҙендә.

Ҡалала эшләүсе үҙәктәр араһында еңеүселәр тип Өфө ҡалаһының Сипайлово биҫтәһендәге операция залы, Яңауыл ҡалаһы һәм Бишбүләк ауылындағы бүлек табылды. Ҙур булмаған ҡалалар араһында Мәләүез, Дүртөйлө һәм Бәләбәй еңеүсе булды. Бәләкәй ҡалалар номинацияһында Аҡъяр һәм Оло Устьикин бүлектәре билдәләнде.

«Күп функциялы үҙәктең иң яҡшы белгесе» номинацияһында Стәрлетамаҡ ҡалаһындағы Күп функциялы үҙәк филиалының баш белгесе Кристина Мортазина еңеү яуланы. Лауреаттар исеменә Өфө ҡалаһындағы «Дим» операция залының баш белгесе Ольга Старцева, Баҡалы ауылында Күп функциялы үҙәк операция залының баш белгесе Иван Назаров, Ҡырғыҙ-Миәкә ауылында Күп функциялы үҙәк операция залының баш белгесе Алина Гәрәева лайыҡ булды.

Шулай уҡ сара барышында Азамат Абдрахманов Башҡортостан Республикаһының Күп функциялы үҙәге директоры Наталья Куприяноваға идара итеүе өсөн рәхмәт белдерҙе һәм Максим Решетниковтың ҡултамғаһы менән Рәсәй Федерацияһы Иҡтисади үҫеш министрлығының Рәхмәт хатын тапшырҙы.

Төбәк этабында еңеүселәр «Рәсәйҙең иң яҡшы Күп функциялы үҙәге» Бөтә Рәсәй конкурсында Башҡортостан Республикаһы исеменән сығыш яһаясаҡ.

Фото Башҡортостан Хөкүмәте сайтынан алынды.