Ҡунаҡ балаларҙы хәстәрләгән өсөн рәхмәт белдерҙе

Яңы йыл алдынан Рәсәй Дәүләт Думаһының мәҙәниәт буйынса комитеты рәйесе Ольга Казакова Өфөгә килде. Ольга Михайловна Рәсәй Дәүләт Думаһы депутаты, "Кесе ватан мәҙәниәте" проекты кураторы Эльвира Айытҡолова,  республикабыҙҙың мәҙәниәт министры Әминә Шафиҡова оҙатыуында беҙҙәге иң боронғо мәҙәниәт усаҡтарының береһе – Башҡорт дәүләт ҡурсаҡ театрының эше менән танышты. Унда, әлбиттә, ошо мәҙәниәт усағының директоры Альберт Имаметдинов та булды.

Башта хөрмәтле ҡунаҡтарға мәҙәниәт усағы буйлап экскурсия ойошторҙолар. Бынан ике йыл элек бында реставрация башланып, ул былтыр тамамланды, хәҙер ҡурсаҡ театрын танырлыҡ та түгел. Беҙгә билдәле булыуынса, ҡурсаҡ театрында тамаша ҡылыу өсөн алдан билет алырға кәрәк, юғиһә ҡалмай, был өфөләрҙең һәм баш ҡала ҡунаҡтарының тамашаға йөрөргә яратыуы тураһында һөйләй.

Дәүләт Думаһы депутаты Ольга Казакова әйтеүенсә, Башҡорт дәүләт ҡурсаҡ театры илебеҙҙең ошо йүнәлештә эш алып барған бүтән мәҙәниәт усаҡтарына һәр йәһәттән дә өлгө булып тора. Ҡунаҡ ундай өлгөләр күберәк булһа ине тигән теләген дә еткерҙе.

– Һоҡланыуым сикһеҙ, шул хәтлем күркәм мәҙәниәт усағы килеп сыҡҡан, – тип һөйләй Ольга Михайловна. – Беҙҙең балаларға, бигерәк тә бөгөнгө ҡыҙ һәм малайҙарға яңы тамашалар кәрәк. Өлкәндәрҙең маҡсаты – ҡыҙ һәм малайҙарға заманса инфраструктура булдырыу.

Ольга Казакова балаларҙы хәстәрләгәне өсөн Башҡортостан Башлығы Радий Хәбировҡа оло рәхмәтен еткерҙе.

Фото: Илдар Аҡъюлов.