Шифахана-курорт дауалау өсөн 100 миллион һум аҡса бүленәсәк

Башҡортостан Республикаһының Ер һәм мөлкәт мөнәсәбәттәре министрлығы махсус хәрби операцияла ҡатнашыусыларға һәм уларҙың ғаиләләренә ярҙам күрһәтеүен дауам итәсәк. 2025 йылда улар өсөн шифахана-курорт дауалауын тәьмин итеүгә 100 миллион һум аҡса бүлеү ҡаралған. Был 2500-ҙән ашыу гражданға шифаханаларҙа дауаланыу курсын үтергә мөмкинлек бирәсәк. Был хаҡта Хөкүмәт ултырышында Башҡортостан Республикаһы Премьер-министры урынбаҫары – ер һәм мөлкәт мөнәсәбәттәре министры Наталья Полянская белдерҙе. Ултырышта ҡатнашыусылар 2025 йылға республиканы ер һәм мөлкәт мөнәсәбәттәре өлөшөндә социаль-иҡтисади үҫтереү пландарын һәм бурыстарын тикшерҙе.

– Граждандарҙың льготалы категорияларын ер участкалары менән тәьмин итеү кәрәклеге мөһим аспект булып тора. Әлеге ваҡытта сиратта 18 меңдән ашыу граждан иҫәпләнә. Уларҙың 293-ө – махсус хәрби операцияла ҡатнашыусылар һәм һәләк булған яугирҙәрҙең ғаилә ағзалары. Был мөһим мәсьәләне хәл итеүҙә республика органдары һәм муниципалитеттарҙың көсөн тупларға кәрәк, – тип билдәләне Хөкүмәт Премьер-министры Андрей Назаров.

Наталья Полянская тупланма бюджет килеменең ыңғай динамикаһы тураһында хәбәр итте: ул һөҙөмтәле һәм мөлкәт менән идара итеү ярҙамында 13,5 миллиард һумдан 14,5 миллиард һумға тиклем артҡан. 2025 йылда көстәрҙе ошо тенденцияны һаҡлауға һәм килем күрһәткестәрен тағы ла юғарыраҡ кимәлгә етеүгә, шул иҫәптән сикләнмәгән ерҙәрҙе файҙаланыуҙы оптималләштереүгә йүнәлтергә кәрәк.

Муниципаль район һәм ҡала округтары хакимиәттәре вәкилдәре һәм ер ҡануниәтен боҙоуҙы иҫкәртеү буйынса тармаҡ органдары вәкилдәре менән берлектә эш дауам итәсәк, тип билдәләне министр. Шулай уҡ импортты алмаштырыу программаһы сиктәрендә йәлеп ителгән ер участкаларын тикшереү планлаштырыла. 2024 йылдың аҙағына программа сиктәрендә дөйөм майҙаны яҡынса 53,5 мең гектарға 653 килешеү төҙөлгән.

Андрей Назаров Ер һәм мөлкәт мөнәсәбәттәре министрлығына ер-мөлкәт активтарын файҙаланыуҙан килемде арттырырға һәм МХО-ла ҡатнашҡандарға ярҙам итеүҙе дауам итергә ҡушты.

Фото: pravitelstvorb.ru