Әбйәлилдәр Йәмәғәт палатаһы вәкилдәре менән осрашты

25 февралдә Башҡортостандың Йәмәғәт палатаһы рәйесе Данияр Абдрахманов Сиҙәм ауылында район халҡы менән осрашты. Сараға ете ауыл халҡы йыйылды. 26 февралдә осрашыуҙар Гусев ауыл советында дауам итте, унда алты ауыл вәкилдәре осрашты.

Сиҙәм ауылында йәшәгән Фирғәт Әхмәтйәнов юлдың цемент заводына тиклемге торошона ҡағылышлы мәсьәләне күтәрҙе. Унда уның ауылдаштарының күбеһе йөрөп эшләй.  Ул шулай уҡ былтыр ябылған Дәүләт дарыуханаһының филиалын ауылға ҡайтарыуҙы һораны. Әммә күптәрҙе борсоған мәсьәләләрҙең береһе, уның фекеренсә, Әлмөхәмәт ауыл биләмәһе халҡын Сибай ҡалаһы дауаханаһына беркетеү мөмкинлеген ҡарарға кәрәк, сөнки уларға Белоретҡа барыу уңайһыҙ, ә Сибай яҡын. Осрашыу аҙағында Фирғәт Әхмәтйәнов бындай осрашыуҙарҙың файҙалы булыуын билдәләне.

Ауыл биләмәһе депутаты Шәһит Ғөбәйҙуллин ирекле көтөүҙә булған һәм юлдарҙа авария хәле тыуҙырған аттарҙың проблемаһына иғтибар итте.

Салауат Хамматов махсус хәрби операцияла ҡатнашыусыларҙың ғаиләләрен утын менән тәьмин итеү мәсьәләһен күтәрҙе. Әлеге проблеманы ҡыҫҡа ваҡыт эсендә Әлмөхәмәт ауыл биләмәһе башлығы Наталья Сатина хәл итергә вәғәҙә бирҙе.

"Утын менән проблема ябай түгел, әммә хәл итерлек. Халыҡтың һәр проблемаһын ыңғай хәл итергә тырышабыҙ. Әгәр ҙә үҙебеҙ урындағы кимәлдә ярҙам итә алмаһаҡ, район советына һәм район хакимиәтенә мөрәжәғәт итәм", - тине Наталья Сатина.

Йәмәғәт палатаһы рәйесе Данияр Абдрахманов Әбйәлил районы халҡы менән осрашыуға комментарий бирҙе:

- Беҙ халыҡтан уларҙы Сибай ҡалаһы дауаханаһына беркетеү үтенесен ишеттек, ошо мәсьәлә менән республиканың Һаулыҡ һаҡлау министрлығына мөрәжәғәт итәбеҙ. Ирекле көтөүҙә йөрөгән йылҡыларға килгәндә иһә, хужаларҙың хоҡуҡтары һәм яуаплылығы ҡануниәттә аныҡ яҙылырға тейеш, тип иҫәпләйем. Халыҡ менән аралашҡандан һуң берәҙәк эттәрҙе тотоу мәсьәләһен көйләргә кәрәклеген билдәләп үткем килә, сөнки был проблема ла өлгөрөп етте.

Фото: Йәмәғәт палатаһы