Рәхәтләнеп Мәскәүҙән башҡортса сәләм ебәрҙе

Үткән йомалағы “Мөғжизәләр яланы” тапшырыуында яҡташыбыҙ Гөлйемеш Иҫәнъюлова (Хәйбуллина) ҡатнашты. Ул тапшырыуҙа рәхәтләнеп башҡортса һөйләп, барлыҡ яҡындарына, туғандарына, коллегаларына сәләм һүҙҙәре тапшырҙы.

“Минең “Мөғжизәләр яланы”нда ҡатнашасағыма ирем аҙаҡҡаса ышанманы”, - тине ул һәм хәләленә лә сәләм юлланы. 

Гөлйемеш Барый ҡыҙы – Баймаҡ районының Таһир ауылынан, әлеге көндә Өфө районының Нижегородка ауылы мәктәбендә уҡытыусы булып эшләй. Яҡташыбыҙ финалға үтмәне, әммә милли кейемдә бик матур сығыш яһап, йырлы-моңло күстәнәстәре, алып барған бүләктәре менән халҡыбыҙҙың талантлы, ҡунаҡсыл, йомарт булыуын тағы бер тапҡыр танытты.

Фотолар: видеонан скриншот.