Башҡортостан Башлығы Ураҙа байрамы менән ҡотланы

Башҡортостан Башлығы Радий Хәбиров республика мосолмандарын Ураҙа байрамы менән ҡотланы.

“Башҡортостандың хөрмәтле мосолмандары! Исламдың мөһим байрамдарының береһе менән ҡотлайым. Байрам изге Рамаҙан айында Ураҙа ғәйетенең тамамланыуын аңлата. Күп быуатлы йолаларҙың береһенең нигеҙендә дөйөм кешелек ҡиммәттәре – ғаиләгә һөйөү, ата-бабаларыбыҙға хөрмәт, йомартлыҡ һәм ҡунаҡсыллыҡ ята. Улар яҡындарыбыҙ, Ватаныбыҙ именлеге хәстәрлеге хаҡына берләштерә.

Рамаҙан мосолмандар өсөн рухи йәһәттән үҫеш, ысын доғалар, мохтаждарға ярҙам күрһәтеү ваҡыты булып тора. Бөгөн барлыҡ мәсеттәрҙә изге ғәмәлдәрҙе ҡылыуға, тыуған ерҙең сәскә атыуы өсөн барыһын да атҡарыуға саҡырыу яңғырай.

Беҙ республикабыҙҙа йәшәүселәрҙең, төрлө конфессия вәкилдәренең хәйриә эшендә бергә ҡатнашыуын, төрлө мөһим социаль башланғыстарҙы тормошҡа ашырыуын, махсус хәрби операцияла ҡатнашыусыларға һәм уларҙың ғаиләләренә ярҙам итеүен күрәбеҙ. Төрлө милләт һәм дин вәкиле булған яҡташтарыбыҙ Рәсәйҙең киләсәге өсөн алғы һыҙыҡта иңгә-иң ҡуйып алыша. Уларҙың өйҙәренә еңеү менән тере һәм имен ҡайтыуын теләйбеҙ.

Ураҙа байрамы – изге күңеллелек, бер-береңә ярҙам һәм берҙәмлек байрамы. Был яҡты көндә өйҙәрегеҙҙә шатлыҡ һәм тыныслыҡ булһын, ә йөрәктәрегеҙ яҡшы өмөт менән тулһын!

Ысын күңелдән һеҙгә һәм яҡындарығыҙға ныҡлы сәләмәтлек, рухи тыныслыҡ, барлыҡ изге башланғыстарҙа уңыштар теләйем.

Башҡортостан Республикаһы Башлығы Радий Хәбиров”.