Башҡортостан Рәсәйҙә спорт объекттары һаны буйынса өс лидер иҫәбенә инде

– Спортта йәмәғәт фекеренең лидеры булып юғары ҡаҙаныштарға һәм еңеүҙәргә күнекмәләр яһаусы, ойоштороусы, төҙөүсе һәм илһамландырыусы тора. Бөгөн Башҡортостанда спорт төрлө йәштәге һәм һөнәр эйәләрен берләштергән ысын милли идеяға әйләнһен өсөн бөтә шарттар ҙа булдырылған, - тип һыҙыҡ өҫтөнә алды Андрей Назаров, сараларҙы асып.

Премьер-министр билдәләүенсә, һуңғы алты йылда спорт менән даими шөғөлләнеүсе республика халҡының һаны 35 процентҡа тиерлек артҡан һәм 2 миллион кешенән ашҡан. Спорт инфраструктураһы ярайһы уҡ яңыртыла. Республика Башлығы Радий Хәбиров инициативаһы буйынса уны үҫтереү буйынса комплекслы программа тормошҡа ашырыла. Ошо йылдар эсендә физик культураны һәм спортты финанслауға яҡынса 35 миллиард һум йүнәлтелгән. 1 мең 400 объект төҙөлгән. Уларҙың һаны буйынса республика илдә өсөнсө урынды биләй. Андрей Назаров һүҙҙәренсә, республика бокс, көрәш, фехтование, еңел атлетика, шорт-трек кеүек спорт төрҙәрендә юғары һөҙөмтәләр күрһәтә. Башҡортостан Республикаһы спорт министры урынбаҫары Сергей Алопин төбәктә заманса һәм уңайлы спорт экосистемаһын булдырыу хаҡында һөйләне.

- Маҡсатыбыҙ - йәшенә, йәшәү урынына йәки физик мөмкинлектәренә ҡарамаҫтан, республикала йәшәүсе һәр кеше өсөн спорт менән шөғөлләнеү. Беҙ объекттар төҙөү менән генә сикләнмәйбеҙ - ихата майҙансыҡтарынан алып юғары спорт оҫталығы үҙәктәренә тиклем система төҙөйбөҙ. Шул уҡ ваҡытта яңы һәм реконструкцияланған объекттар инклюзив талаптарҙы иҫәпкә алып проектлана. Спорт өҫтөнлөк түгел, ә хоҡуҡ, - тип һөйләне министр урынбаҫары. Шулай уҡ ул тренерҙар өсөн белем биреү системаһын булдырыу буйынса әҙерләнгән саралар тураһында өҫтәй. Дискуссия барышында күренекле спортсыларҙың сығыштары айырыуса иғтибарҙы йәлеп итә. Еңел атлет, Рәсәйҙең атҡаҙанған спорт мастеры, 2012 йылда Паралимпия уйындарының көмөш призеры һәм 2020 йылда Токиола Паралимпия уйындарының бронза призеры, туп ырғытыу буйынса өс тапҡыр донъя Һәм Европа чемпионы спорт тармағын үҫтереү буйынса үҙ ҡараштары менән уртаҡлашты.

- 2010 йылда Сыуашстандан Өфөгә күсеп килдем. Башҡортостан минең өсөн профессиональ спортсыға әйләндергән төбәк булды. Бында юғары уҡыу йортона уҡырға индем, спортта яңы үрҙәргә өлгәштем, республикала спортты үҫтереү буйынса бөтә башланғыстарҙа ла хуплау тоям, - ти Анна Кулинич-Сорокина. Спортсылар республикала юғары һөҙөмтәләргә өлгәшеүгә, шулай уҡ күмәк һәм һәүәҫкәр спортты үҫтереүгә йүнәлтелгән спортты системалы яҡлауҙы юғары баһаланы. Иғтибарҙы талап иткән көнүҙәк саҡырыуҙар араһында спортсылар тренерҙар һәм спорт өлкәләрендә квалификациялы кадрҙар етешмәүен билдәләй. Уларҙың фекеренсә, профессиональ белгестәрҙе әҙерләүҙе һәм тотоуҙы көсәйтеү, тренер һөнәренең йәлеп итеүсәнлеген арттырыу, шулай уҡ педагогтарҙың һәм остаздарҙың өҙлөкһөҙ профессиональ үҫеше өсөн шарттар булдырыу мөһим. Был, уларҙың фекеренсә, спортты тотороҡло үҫтереү һәм яңы быуын чемпиондарын тәрбиәләү юлында мөһим аҙым буласаҡ. Эшлекле иртәнге аш барышында ҡатнашыусылар шулай уҡ сәләмәт йәшәү рәүешен популярлаштырыу, спорт инфраструктураһын үҫтереү, күмәк һәм профессиональ спортҡа ярҙам итеү мәсьәләләрен, халыҡтың физик культура менән шөғөлләнеүгә йәлеп ителеү кимәлен күтәреү буйынса сараларҙы тикшерҙе.

“Беҙ Башҡортостанда спорттың ысын милли идеяға әйләнеүен һәм төрлө йәштәге һәм төрлө һөнәр эйәләрен берләштереүен теләйбеҙ. Спорт инфраструктураһын ярайһы уҡ яңырттыҡ, уны үҫтереү буйынса комплекслы программаны тормошҡа ашырабыҙ. Ошо йылдар эсендә физкультураны һәм спортты финанслауға 35 миллиард һум самаһы аҡса йүнәлтелде. 1400 объект төҙөнөк. Архитектура һәм төҙөлөш ҡарарҙарында һаулыҡ мөмкинлектәре сикләнгән кешеләрҙең ихтыяждарын мотлаҡ иҫәпкә алабыҙ, бында барыһы ла ҡәтғи”, - тип яҙа үҙенең социаль селтәрендә Башҡортостан Республикаһы Хөкүмәте Премьер-министры Андрей Назаров.