Кемдә - нимә, ә Гөмбәлә өмә!

Асҡын районының Гөмбә ауылы халҡы көҙ етһә, шау-гөр килеп, өмәләр үткәрергә тотона. Лира һәм Фларит Рәхимовтар был күңелле эште башҡаларҙан иртәрәк башланы. Ауыл кешеһенең эше лә, байрамы ла бергә. Күрше-күлән ең һыҙғанып ярҙамға килә, өй эсе йырға, уйын-көлкөгә тула .Кемдер ҡаҙ йолҡа, кемдер йыуа-сайҡата, берәүҙәр оҫталыҡ дәрестәре менән бүлешә.Быуындан-быуынға күсеп килгән хеҙмәт байрамы туғандарҙы, күрше-күләнде нығыраҡ берләштерә, аралаштыра, туғанлыҡ тамырҙарын нығыта.

Бына мәшәҡәтле эш тамамлана, хужабикә аш-һыу тирәһендә өйрөлә, табынға  ҡаҙ ите менән бешерелгән бәлеш  тә килеп ултыра, өҫтәл тирәләй йәше-ҡарты, бала-саға урын ала... Ҡаҙ өмәләре – ябай хеҙмәт кенә түгел,  ә үткәнде киләсәк менән тоташтырыусы күпер. Бәхет бит тап ошондай ваҡ ғәмәлдәрҙә сағыла  – тыуған яғыңдағы хеҙмәттә, яҡындарың менән аралашыуҙа, ата-бабалар традицияларына хөрмәттә.

Фото: “Аскинская новь” гәзите.