Ә һеҙҙең ауылда интернет бармы әле?

Биш йыл эсендә Башҡортостанда интернетҡа тоташҡан йорт хужалыҡтары һаны 75-тән 92 процентҡа тиклем артҡан. Был хаҡта Башҡортостан Башлығы Радий Хәбиров уҙғарған аҙналыҡ оператив кәңәшмәлә республика дәүләт идаралығының һанлы үҫеш министры Геннадий Разумикин хәбәр итте.

– Элемтә операторҙары үҙ инвестициялары һәм федераль программаларҙа ҡатнашыу иҫәбенә был үҫеште тәьмин итте, – тип билдәләне ведомство етәксеһе. – Шулай уҡ Башҡортостан халҡының 92 проценттан ашыуы юғары тиҙлекле мобиль интернет менән файҙалана.

Биш йыл эсендә компаниялар 4G стандартының 7 меңдән ашыу база станцияһын урынлаштыра һәм модернизациялай. 2025 йылда ғына операторҙар 2 меңгә яҡын станцияны эшләй башлай һәм 90-ға яҡын тораҡ пунктты элемтә менән тәьмин итә. 2026 йылда улар эш күләмен һаҡлап ҡалырға ниәтләй.

Министр билдәләүенсә, республикала “Һанлы тигеҙһеҙлекте бөтөрөү 2.0” федераль проектын әүҙем тормошҡа ашыралар. Уның буйынса 350-нән ашыу тораҡ пункт интернетҡа тоташтырылған, шуларҙың 87-һе – былтыр. Өс йыл рәттән Башҡортостан үҙ ауылдарын тоташтырыу өсөн тауыш биреүҙә халыҡтың әүҙемлеге буйынса илдә беренсе урынды биләй. Унда йыл һайын тиҫтәләрсә мең кеше ҡатнаша.

Федераль һәм төбәк трассаларын элемтә менән тәьмин итеүгә айырыуса иғтибар бүленә. Өфө – Белорет автомобиль юлында һуңғы ике йылда 11 база станцияһы төҙөлдө. Атап әйткәндә, бында Елмерҙәк участкаһын элемтә менән тәьмин итеү буйынса уникаль проект тормошҡа ашырыла. Бында дөйөм электр селтәренә тоташтырылмаған автономлы энергия сығанаҡтары менән база станцияһы ҡуйылған. Хәҙер был киҫелештә тотороҡло элемтә бар, был айырыуса ашығыс хеҙмәттәрҙе оператив саҡырыу өсөн мөһим.

Бынан тыш, республикала бәләкәй тораҡ пункттарҙа сымлы интернет үҫтерелә. “Ростелеком в Башкортостане” компанияһы менән берлектә тормошҡа ашырылған “Доступный интернет” проекты 300-гә яҡын ауылда 70 меңдән ашыу йорт хужалығын тоташтырырға мөмкинлек биргән.

Республика Башлығы төбәктә һанлы инфраструктураны үҫтереүҙең һөҙөмтәлелеген юғары баһаланы һәм министрлыҡҡа башҡарған эштәре өсөн рәхмәт әйтте. Радий Хәбиров шулай уҡ Өфө – Белорет юлын элемтә менән тәьмин итеүҙе тамамларға ҡушты.

Фото: Башҡортостан Башлығы айты.