Бәхил булығыҙ, Константин Борисович

Бөгөн Башҡортостан халҡы үҙенең алмаштырғыһыҙ парламент рәйесе – Константин Толкачев менән бәхилләште. Матәм сараһы Өфөләге Дәүләт Йыйылышы – Ҡоролтай йортонда булды. Константин Борисовичты һуңғы юлға оҙатыр өсөн меңәрләгән кеше килде.

Башҡортостан Башлығы Радий Хәбиров әйтеүенсә, бөгөн республика бик ауыр юғалтыу кисерҙе. Константин Толкачев менән тотош бер дәүер китә, тине.

– Беҙ Башҡортостандың күренекле дәүләт эшмәкәре, республика Дәүләт Йыйылышы – Ҡоролтайҙың алмаштырғыһыҙ рәйесе һәм өлкән иптәшебеҙ Константин Борисович Толкачевты һуңғы юлға оҙатабыҙ. Минеңсә, уның менән тотош бер дәүер китте. Хәҙерге Башҡортостандың барлыҡҡа килеүе, формалашыуы дәүере, уның бик ҡатмарлы йылдары. Әле был залда заманса Башҡортостанды булдырған, уны үҫтергән, алға этәргән, бөтә көсөн Башҡортостанға хеҙмәт итеүгә бағышлаған кешеләр йыйылған. Һәм, әлбиттә, Константин Борисович бында хәл иткес роль уйнаны: республикабыҙ ҡануниәте системаһын формалаштырҙы. Ул бик һөҙөмтәле, заманса саҡырыуҙарға яраҡлаштырылған. Был уның юриспруденция буйынса тәрән белеме, сәйәси аҡылы һәм юғары интеллекты арҡаһында мөмкин булды. Ул бик ҡатмарлы йылдарҙа етәксе булды, мөһим ҡарарҙар ҡабул итергә, төрлө сәйәси көстәр, халҡыбыҙҙың сәйәси өҫтөнлөктәре араһында компромисс табырға, аҡыллы ҡарарҙар ҡабул итергә һәм Дәүләт Йыйылышын һәм сәйәси процестарҙы бик аҡыллы һәм низағһыҙ идара итергә кәрәк булғанда эшләне,– тине Радий Фәрит улы.

Башҡортостан Башлығы уның һуңғы йылдарҙағы берҙәм эшмәкәрлеге өсөн дә ҙур рәхмәт әйтте.

– Бик ауыр, ҡатмарлы минуттарҙа ла, республикабыҙҙағы ҡатмарлы сәйәси көрсөктәрҙә лә, ковид ваҡытында ла, махсус хәрби операция ваҡытында ла, санкция баҫымы ваҡытында ла, аҡыллы һәм формаль булмаған кәңәш алырға кәрәк булғанда ла, беҙ Константин Борисовичҡа мөрәжәғәт иттек һәм һәр ваҡыт яуап алдыҡ. Уның янында үҙебеҙҙе ҡая артында кеүек тоя инек, – тине ул.

Радий Хәбиров Константин Толкачевтың ғаиләһенең, ҡатыны Нина Николаевнаның ауыр ҡайғыһын уртаҡлашты, уларға ныҡлыҡ теләне.

Федерация Советы рәйесе Валентина Матвиенко исеменән ҡайғы уртаҡлашыу һүҙҙәрен сенатор Лилиә Ғүмәрова белдерҙе. Уның һүҙҙәренсә, Константин Толкачев Рәсәй ҡануниәтен булдырыуға баһалап бөткөһөҙ өлөш индергән, Европа советында Рәсәй мәнфәғәттәрен лайыҡлы һәм намыҫ менән яҡлаған.

Абхазия президенты Бадра Гунба үҙенең телеграммаһында абхаз халҡынан ҡайғы уртаҡлашыу һүҙҙәрен белдерҙе. Телеграмманы Абхазия Халыҡ йыйылышы спикеры Лаша Ашуба уҡыны. Татарстан Дәүләт Советының почетлы рәйесе Фәрит Мөхәмәтшин билдәләүенсә, бөгөн ул күренекле дәүләт эшмәкәре менән генә түгел, ә 20 йылдан ашыу бергә эшләгән дуҫы менән дә хушлаша.

– Константин Борисович ысын генерал, бик аҡыллы һәм аҡыллы сәйәсмән булды, ул һәр ваҡыт Башҡортостан мәнфәғәттәрен яҡланы. Барыбыҙға ла уның кәңәштәре етмәйәсәк. Ҡәҙерле дуҫым һәм иптәшем, тыныс йоҡла, – тине Фәрит Мөхәмәтшин.

Шулай уҡ республиканың дин әһелдәре, Дәүләт Йыйылышы – Ҡоролтай вәкилдәре, мәрхүмдең яҡындары бәхилләшеү һүҙҙәрен әйтте. Айырыуса тормош иптәше Нина Николаевнаның һүҙҙәре йөрәктәргә үтеп инде.

– Минең донъялағы иң яҡын кешем ул, ҡояшым кеүек булды. Арып ҡайтһа ла, өйгә инеү менән йылмая ине. Ғүмеребеҙ буйы бер ауыр һүҙ әйтмәне, бер тапҡыр ҙа тауышын күтәрмәне. Уның бик йәшәгеһе килә ине, сире ҡаты булһа ла, эшләргә лә, яҡындарына ла бүлергә ваҡыт тапты, – тине ул.

Константин Толкачевты Көньяҡ зыярытта ерләнеләр.

Айрат Нурмөхәмәтов фотолары.