12 йыл элек ҡылынған енәйәтте асҡандар

Ул ваҡытта Илтабан ауылында сәнсеп үлтерелгән 68 йәшлек ир кәүҙәһен табалар, әммә ғәйеплене асыҡлай алмайҙар.

2026 йылда тикшереүсе-криминалистар эш материалдарын яңынан анализлап, шаһиттарҙан һорау алып, енәйәтсенең эҙенә төшәләр. Шик аҫтына алыныусыны (ул элек тә танышын үлтергәнсе туҡмаған өсөн хөкөм ителгән булған) Мәскәүҙә тотҡандар һәм Учалыға килтергәндәр.

Енәйәт ҡылыуын иҫбатлаған материалдар һөҙөмтәһендә ир ғәйебен таный: 2014 йылдың февралендә, 14-енән 15-енә ҡарай төндә, табын артында хужа менән эләгешеп китә һәм уның баш өлөшөнә дүрттән күберәк тапҡыр сәнсә. Шунан һуң ваҡиға урынынан ҡасып китә.

Енәйәт эше судҡа ебәрелгән.

Фото: видеонан скриншот.