Тележурналист бензин проблемаһын нисек хәл иткән?

Телевидение журналисы Илдар Байбулатов кисә социаль селтәрҙәге сәхифәһендә ҡыҙыҡлы яҙма ҡалдырған. 

"Яғыулыҡ менән бәйле ҡатмарлыҡтарҙы иҫәпкә алып, бөгөн эшкә велосипедта килдем! Тәүҙә тик ыңғай яҡтарын ғына күрҙем: физик күнекмә, бензин кәрәкмәй, тығындар юҡ, туҡталҡала урын эҙләп тә баш ватаһы түгел. Әммә барыһы ла мин уйлағанса түгел икән. Иң беренсе - тир бүленеп сығыуы, икенсеһе -һауа торошоноң боҙолоуы, өсөнсөһө инде - иң мөһиме - Рәмзиә Рафаэль ҡыҙының минең менән йөрөй алмауы. Ҡайтҡанда ямғыр ғына яуып ҡуймаһын..." - тигән ул.

Комментарийҙар шаярыу-ҡатыш. 

"Велосипед артынан йүгереп барам инде", - тигән ҡатыны, тележурналист, БР Дәүләт Йыйылышы - Ҡоролтай депутаты Рәмзиә Кәримова-Байбулатова.

"Йәш саҡтағы кеүек Рәмзиәне рамға ултыртып ал, йәшлегегеҙ иҫкә төшөр" тиеүҙәренә Илдар: "Рамы ла, багажнигы ла юҡ шул хәҙерге велосипедтарҙың", - тип яуап биргән.

"Тиҙ арала Рәмзиәгә велосипед бүләк итегеҙ, бик яҡшы булыр, барыһы өсөн үрнәк, файҙаһы күберәк" тигәндәре лә, бер нисә пункттан торған план-кәңәштәр ҙә бар:

"Илдарҙың башланғысын хуплап, тәҡдимдәр: 1.Телевидение етәкселегенә велосипедта эшкэ йөрөүселәргә шарттар тыуҙырыу (велотуҡталҡа, душ, төштән һуң йоҡлап алыу) 2. Рәмзиәгә лә велосипед алып биреү - артта ҡалмаһын өсөн электр велосипеды. 3. Был миҫалды бөтә ТВ-ға киң йәйелдереү. 4. "Сәпиттә интервью" тапшырыуын булдырыу. Һөҙөмтәлә бөтәһенә лә файҙа: ТВ хеҙмәткәрҙәренең һаулығы ныҡ, үҙҙәре матур, ә беҙгә - бензин!"

Шаярыу шаярыу менән, был проблема ваҡытлыса ғына күренеш булһын инде. Хәҙерге заманда машинаһыҙ ике ҡулһыҙһың: эш-йомош буйынса көн-төн сабаһың. Еңел автомобилгә байлыҡ билдәһе тип ҡарау мәле үтте, ул көн дә бик-бик кәрәк.

Фото: И. Байбулатовтың шәхси архивынан.