Гастроль туры тамамлана

17-19 сентябрҙә Өфөлә үтәсәк Ижади һәм фәнни интеллигенция форумы сиктәрендә Башҡортостандың баш ҡалаһында Бойондороҡһоҙ Дәүләттәр Берләшмәһе йәштәр симфоник оркестрының 2024 йылдағы йомғаҡлау сығышы буласаҡ.

БДБ-ның йәштәр симфоник оркестры БДБ-ға ингән дәүләттәрҙең дәүләт-ара гуманитар хеҙмәттәшлек фонды инициативаһы буйынса ойошторола. Оркестр тәүге тапҡыр 2007 йылдың ноябрендә Ҡаҙағстандың баш ҡалаһы Астанала БДБ дәүләттәренең Ижади һәм фәнни интеллигенцияһының II форумына арналған концертта ҡатнашыу өсөн йыйыла.

Концерт программаһына Рәсәйҙең, Ҡаҙағстандың һәм Татарстандың халыҡ артисы Фуат Мансуров дирижерлыҡ итә. БДБ Йәштәр симфоник оркестрының сығыштары географияһы йыл һайын киңәйә: Азербайжан һәм Әрмәнстан, Беларусь һәм Ҡаҙағстан, Ҡырғыҙстан һәм Үзбәкстан, Төркмәнстан. Оркестрҙың концерттары Нью-Йоркта БМО Генераль ассамблеяһы залында һәм Парижда ЮНЕСКО штаб-фатирында үтә. Оркестр менән төрлө илдәрҙән бик күп күренекле музыканттар эшләй.

2019 йылдан оркестрға Рәсәйҙең халыҡ артисы, «Берләшмә йондоҙҙары» премияһы лауреаты Сергей Скрипка етәкселек итә. Маэстро менән бергә дирижер пульты артына Башҡортостандың халыҡ артисы Дмитрий Крюков - Башҡортостан Республикаһы дәүләт академия симфоник оркестрының баш дирижеры, Рәсүл Клычев - Төркмәнстан Дәүләт симфоник оркестрының художество етәксеһе, Константин Науменко - Жуков симфоник оркестры дирижеры һәм Азербайжан дирижеры Мортуза Бюльбюль баҫасаҡ.

Был көндәрҙә Башҡортостандың Дәүләт оркестры менән ҡушыласаҡ йәштәр симфоник оркестры составына, ғәҙәттәгесә, БДБ илдәренең йәш музыканттары, абруйлы музыкаль конкурстар еңеүселәре инде. Өфөлә уларҙың концерт программаһына Рәсәй һәм сит ил композиторҙарының популяр классик музыка әҫәрҙәре индерелгән.

Ижади һәм фәнни интеллигенция форумы сиктәрендә йылдың гастроль турын тамамлау һуңғы йылдарҙа оркестрҙың яҡшы традицияһына әүерелде. Бынан тыш, оркестр сығыш яһаған бөтә илдәрҙә лә йәш музыканттар өсөн төрлө мәҙәни программа әҙерләнә, ул БДБ илдәренең талантлы йәштәренең дуҫлығын нығытыуға һәм уңышлы аралашыуына булышлыҡ итә.

Хәтерегеҙгә төшөрәбеҙ, БДБ-ның XVII Ижади һәм фәнни интеллигенция форумы Өфөлә 17-19 сентябрҙә үтәсәк. Ойоштороусылар - БДБ илдәренең дәүләт-ара гуманитар хеҙмәттәшлек фонды һәм Башҡортостан Республикаһы Хөкүмәте. Рәсәйҙә слет дүртенсе тапҡыр үткәрелә. Башҡортостандың баш ҡалаһы форумды тәүге тапҡыр ҡабул итә.

Фото: gasorb.ru

6+