Төрөк һәм монгол халыҡтары әҫәрҙәре баҫылып сыҡты

ХХ быуаттың 90-сы йылдарында Рәсәй Федерацияһында әҙәбиәткә, китап нәшриәтенә һәм уҡыуға ярҙам итеү буйынса комитет ойошторола, рәйесе итеп С. Е. Нарышкин тәғәйенләнә.

РФ халыҡтарының милли әҙәбиәттәренә ярҙам программаһының федераль редакция советына 22 милли республиканың һәм 11 өлкә һәм округтың бөтә мөхәррирҙәре инә. Башҡорт редакцияһы исеменән филология фәндәре кандидаты, доцент, Милли әҙәбиәт музейы директоры З.А. Әлибаев сығыш яһай.

Шиғриәт, проза, драматургия, публицистика, балалар әҙәбиәте һәм халыҡ аҡылы антологияһының айырым томдары сыға. 2025 йылда Мәскәүҙә "Төрки һәм монгол халыҡтарының шиғриәте һәм прозаһы" йыйынтығы  нәшер ителә. Антологияға 18 телдә ижад иткән шағирҙар һәм прозаиктар әҫәрҙәре тупланған. Төрки һәм монгол халыҡтарының күп телле шиғриәт һәм проза антологияһы "Рәсәй халыҡтарының хәҙерге әҙәбиәте" серияһын дауам итә, ул киң уҡыусылар даирәһенә күп милләтле илебеҙҙең заман әҙәбиәтен тәҡдим итә.

Әҫәрҙәр ике телдә баҫылған: рус һәм милли телдәрҙә. Башҡорт әҙәбиәтен яңы томда халыҡ шағирҙары һәм яҙыусылары Гүзәл Ситдиҡова һәм Әмир Әминев, прозаиктар Гөлсирә Ғизәтуллина, Фәрзәнә Аҡбулатова, Рәлис Ураҙғолов, шағирҙар Зөлфиә Ханнанова, Миңзәлә Шөғәйепова, Салауат Әбүзәр, Фәнил Бүләков һәм Гөлнара Хәлфетдинова тәҡдим итә.