“Урал батыр” тел һөйөүселәрҙе йыйҙы

Ауылдың мәҙәниәт йортонда боронғо йолалар, сәсәндәрҙең тере һүҙе, йола фольклорының тәрәнлеге бергә ҡушылған күркәм  “Урал батыр” байрамы үтте.

Сараның махсус ҡунағы һәм илһамландырыусыһы – филология фәндәре докторы, Башҡортостандың халыҡ сәсәне Розалия Солтангәрәева йолаларҙың мәғәнәһен аңлатты. Район мәктәптәре уҡыусыларынан алып өлкәндәргә тиклем үлемһеҙ эпос юлдарын сәхнәнән ишеттерҙе. Айырыуса Кинйә Арыҫланов исемендәге 9-сы башҡорт гимназияһы уҡыусыһы Илсур Абдрахмановтың сығышы сағыу һәм иҫтә ҡалырлыҡ булды.

Байрамға килеүселәр “Ҡот ҡайтарыу” һәм башҡа йола-ырымдар аша яуызлыҡтың, дошманлыҡтың һәм яу ялҡынының һүнеүен, ә мөхәббәт утының, йорт усағының һәм күңел йылыһының дөрләүен теләне. Мәҙәниәт хеҙмәткәрҙәре әҙерләгән ҡул эштәре күргәҙмәләре, концерт номерҙары сараны айырата йәмләне.