Федераль ҡунаҡ Башҡортостандағы фән үҫешен юғары баһаланы

Милли технология башланғысы (НТИ) фондының генераль директоры, «Университет-2035» ректоры Вадим Медведев Башҡортостандың ғилми-мәғрифәти мөмкинлектәре менән танышты. Федераль эксперт фәнни инфраструктураның төп объекттарында – вуз-ара студенттар кампусы лабораторияларында һәм үҙәктәрендә, Өфө фән һәм технологиялар университетының «Киләсәк моторҙары» алдынғы инженерлыҡ мәктәбендә, Евразия фәнни-тикшеренеү үҙәгендә булды. НТИ фонды башлығы Башҡортостанда фәнни потенциалды үҫтереү өсөн ярҙам сараларын һәм экосистеманы юғары баһаланы.

– Республика етәкселеге һалған тырышлыҡ, уҡыу йорттары практикаһында, Евразия ғилми-белем биреү үҙәге мөхитендә, производствола тормошҡа ашырылған башланғыстар – матур муйынсаҡ барлыҡҡа килтерерлек ынйылар. Һуңғы йылдарҙа һеҙҙә етди аҙымдар яһалды, атап әйткәндә, вуз-ара кампус эш башланы, Фән һәм юғары белем биреү буйынса дәүләт комитеты булдырылды. Улар бизнеста, сәнәғәттә Башҡортостанда етештерелгән һәм эшләнгән аныҡ һөҙөмтәләргә килтерәсәк, – тип билдәләне Вадим Медведев.

Федераль ҡунаҡ Ғилми-белем биреү лекторийы проектының спикеры булараҡ та сығыш яһаны. Ул Өфөләге Евразия ғилми-белем биреү йортоноң Интеллектуаль сәхнәһендә «Рәсәйҙең технология лидерлығына юл» темаһы буйынса сығыш яһаны.

Проектты тормошҡа ашырыу барышында лекторий майҙансығында 30-ҙан ашыу ғалим сығыш яһаны. Был сығыштарҙы офлайн алымда – 4,4 мең, онлайн алымда 66 мең кеше тыңланы.

Иҫегеҙгә төшөрәбеҙ: Президент Владимир Путин ҡушыуы буйынса Рәсәйҙә заманса кампустар селтәре булдырыла. «Фән һәм университеттар» милли проекты ярҙамында ошондай 17 студент ҡаласығын проектлау һәм төҙөү башланды. 2030 йылға кампустар һаны – 25-кә, 2036 йылға 40-ҡа етәсәк. 2025 йылдан «Заманса кампустар селтәрен булдырыу» федераль проекты «Йәштәр һәм балалар» милли проекты ярҙамында тормошҡа ашырыла. Өфөләге вуз-ара кампус проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялар, эшлекле зоналар, магазиндар, уңайлы скверҙар һәм башҡа уңайлы ҡала мөхите объекттары менән студенттар киңлеге ул.

Сығанаҡ: pravitelstvorb.ru