Өфө вуз-ара кампусына хирургтар йыйылды

Бер нисә көнгә Өфө һәм вуз-ара кампус күкрәк ситлеге органдарына операция яһаусы иң яҡшы табиптарҙы йәлеп итеү урынына әүерелде. Башҡорт дәүләт медицина университеты майҙансығында «Өйрәтеү, тәжрибә, профессионаллек» торакаль хирургтарҙың Евразия конгресы уҙҙы.

Сарала Рәсәйҙән алдынғы торакаль хирургтар, шул иҫәптән Рәсәй Һаулыҡ һаҡлау министрлығының баш торакаль хирургы, профессор Петр Яблонский, Рәсәй Фәндәр академияһы академигы Владимир Порханов, профессор, Герцен исемендәге Онкология ғилми-тикшеренеү институты директоры урынбаҫары Андрей Рябов һәм башҡа илдәрҙән эксперттар ҡатнашты. Конгреста ҡатнашыусылар менән 700-гә яҡын хирург үҙ тәжрибәһе менән уртаҡлашты.

Конференция алдынан БДМУ клиникаһының лекциялар залында студент-медиктарға Харбин медицина университеты докторы Хао Сюй (Ҡытай) роботлаштырылған һәм аҙ инвазив торакаль хирургия тураһында лекция уҡыны. Ҡытай профессоры Башҡорт дәүләт медицина университеты студенттарының уҡыу процесына һәм яңы белем алыуға йәлеп ителеүен билдәләне.

Евразия торакаль хирургтар конгресына бай эшлекле программа индерелде. Пленар сессияла ҡатнашыусылар Рәсәйҙә хәҙерге заман хирургияһы үҫешен тикшерҙе.

Белешмә

Хәтерегеҙгә төшөрәбеҙ, Президент Владимир Путин ҡушыуы буйынса Рәсәйҙә заманса кампустар селтәре булдырыла. «Фән һәм университеттар» милли проекты ярҙамында 17 шундай студенттар ҡаласығын проектлау һәм төҙөү башланды. 2030 йылға кампустар һаны – 25-кә, ә 2036 йылға 40-ҡа етәсәк. 2025 йылдан заманса кампустар селтәрен булдырыу федераль проекты “Йәштәр һәм балалар” милли проекты ярҙамында тормошҡа ашырыла. Был эш РФ Хөкүмәте һәм Рәсәй Фән һәм юғары белем биреү министрлығы ҡатнашлығында ойошторола.

Өфө вуз-ара кампусы проекты – ул 4,3 мең кешегә иҫәпләнгән торлаҡ биналар, уҡыу комплекстары, лабораториялар, эшлекле зоналар, магазиндар, уңайлы скверҙар һәм башҡа уңайлы ҡала мөхите объекттары булған студенттар майҙансығы.

Сығанаҡ: pravitelstvorb.ru

Беҙҙең МАХ каналына https://max.ru/gazetabashkortostan ҡушылығыҙ!