Алғы һыҙыҡта атаһы ҡыҙы менән осрашҡан

Халыҡ фронтының йәштәр бүлегенең гуманитар миссияһы ярҙамында Башҡортостандан махсус хәрби операция яугире оҙаҡ айырылышып торғандан һуң ҡыҙы менән осрашты.

Башҡортостан йәштәре Мари Иле һәм Смоленск өлкәһе ирекмәндәре менән бергә эвакуацияланған халыҡҡа һәм махсус операцияла ҡатнашыусыларға ярҙам итеү өсөн Курск өлкәһенә килде. Халыҡ фронтының йәштәр бүлегенең гуманитар миссияһының йыйылма төркөмө составында егет-ҡыҙҙар келәттәрҙә, хәрби госпиталдә эшләй һәм ваҡытлыса урынлаштырыу пункттарына сыға.

Команда ағзаларының береһе Лилиә Сәғиҙуллина командировкала күптән күрешмәгән атаһы менән осраша, ул өлөшләтә мобилизация сиктәрендә МХО зонаһына юлланған була. Атаһының хәҙер Курск йүнәлешендә хәрби бурыс үтәүе тураһында ҡыҙ гуманитар миссияны ойоштороусыларға һөйләй. Халыҡ фронты туғандар өсөн сюрприз-осрашыу ойоштора.

Был Өфөнән ир-егет өсөн Атайҙар көнөнә үҙенсәлекле бүләк була.

- Ҡыҙымдың Курскиҙа булыуын белгәс, тәүҙә бик борсолдом. Сөнки бында тыныс түгел. Был осрашыуҙы ойошторғандарҙың барыһына ла рәхмәт. Көтөлмәгәндә ҡыуаныслы хәл булды, - тип шатлығын уртаҡлашҡан "Мудрый" позывнойлы атай кеше.

Лилиә Сәғиҙуллина атаһы фронтҡа киткәндән һуң ирекмән булып китә. Ул яңы төбәктәргә гуманитар ярҙам ойошторорға һәм ебәрергә ярҙам итә, маскировка селтәрҙәре бәйләй, хәрбиҙәр өсөн йылы әйберҙәр бәйләй.

- Курск өлкәһендә эшләү өсөн команда йыйғанда, Лилиә тәүгеләрҙән әҙер булыуын белдерҙе. Ул атаһының хәҙер Курск сиген һаҡлауын һөйләне. Күрешеү бик шәп булыр ине, тине, әммә ысынлап осрашыуға иҫәп тотманы. Беҙҙең команда уға сюрприз ойошторорға ҡарар итте - ярты йыл осрашмағандан һуң ил һаҡсыһы һәм уның тылда яугирҙәргә ярҙам иткән ҡыҙы осрашты, - тип һөйләне Башҡортостан Халыҡ фронтының йәштәр бүлеге координаторы Рөстәм Сәләхетдинов.

Фото: Башҡортостандың Халыҡ фронтынан.