"Халыҡ фронты. Барыһы ла Еңеү өсөн!" күкрәк билдәләре тапшырылды

Награда махсус хәрби операцияла ҡатнашыусыларға һәм яңы территорияларҙа йәшәүселәргә ярҙам итеүгә өлөш индергән өсөн бирелә. Бүләкләнгәндәр араһында педагогтар, табиптар, эшҡыуарҙар, власть һәм эре предприятиелар вәкилдәре, артистар бар.

- Был залда республикабыҙҙың иң әүҙем, битараф булмаған кешеләре йыйылды. Үҙ көсөнә ҡарап фронтҡа ярҙам итеүселәр һәм махсус хәрби операция сиктәрендә беҙҙең еңеүҙе яҡынайтыусылар. Гуманитар ылауҙарҙы ойоштороуҙа ҡатнашҡан хеҙмәт коллективтары хәрбиҙәр өсөн ҡиммәтле махсус техника һатып ала, МХО-ла ҡатнашыусыларҙың ғаиләләренә матди ярҙам күрһәтә. Хәрби хеҙмәткәрҙәргә, яңы төбәктәрҙә йәшәүселәргә ярҙам күрһәтеү өсөн күп тапҡырҙар Донбассҡа барған табиптар. Республика халҡы маскировка селтәрҙәре бәйләй, окоп шәмдәре ҡоя, яугирҙарыбыҙ өсөн өй һалмаһы, быҡтырылған ит әҙерләй. Мин үҙем махсус хәрби операцияла булдым, шуға күрә бындай хәстәрлек яугирҙарыбыҙҙы йылыта, уларҙың рухын күтәрә икәнен беләм, — тип билдәләне Башҡортостан Башлығы Хакимиәте Етәксеһе вазифаһын башҡарыусы Азат Бадранов.

Миҫалдар күп. Стәрлетамаҡ эшҡыуары Александр Кузьменко 3D-принтерҙарҙа дрондарҙан боеприпастар ташлау өсөн деталдәр етештерә. Өфөнән Павел Попков FPV-дрондар эшләй. Халыҡ фронты вәкиле, БР Дәүләт Йыйылышы — Ҡоролтай депутаты Әлфит Ниғәмәтйәнов булышлығында 49 төбәктән биш меңдән ашыу яугир һәм уларҙың ғаилә ағзалары хоҡуҡи ярҙам алды. Башҡортостан ҡаҙнасылығы хеҙмәткәрҙәре маскировка селтәрҙәре бәйләй. Салауаттан Александр Бабаян бер нисә тапҡыр гуманитар ылауҙар ойошторҙо һәм оҙатып йөрөнө.

- Беҙ яугирҙарыбыҙға ярҙам итер өсөн көсөн йәлләмәгән ватандаштарыбыҙға рәхмәт әйтәбеҙ. Халыҡ фронты аша алғы һыҙыҡҡа төрлө ярҙам төрҙәре ебәрелә: шоколадтан алып бульдозерға тиклем, квадрокоптерҙан алып окоп шәменә тиклем, — тип һыҙыҡ өҫтөнә алды Башҡортостанда Халыҡ фронты рәйестәше Шамил Вәлиев.

Фото: Валерий ШАХОВ.

Сығанаҡ: https://resbash.ru/news/obshchestvo/2024-11-25/zhitelyam-bashkirii-vruchili-nagrudnye-znaki-narodnyy-front-vsyo-dlya-pobedy-4022838