Эт 1500 километр юл үткән

Башҡортостандан МХО яугире ғаиләһенә барып етеү өсөн фронт эте Арей дүрт төбәк һәм биш тораҡ пункт аша поезда һәм машинала 1500 километрҙан ашыу юл үткән. Уға урынға барып етергә Халыҡ фронтының йәштәр командаһы ағзалары ярҙам итә.

Башҡортостандың Бәләбәй ҡалаһында йәшәгән ҡатын социаль селтәр аша ирекмәндәргә мөрәжәғәт иткән. Ул ире алғы һыҙыҡта осратҡан һәм тәрбиәләп алған этте махсус хәрби операция зонаһынан алып сығыуҙа ярҙам итеүҙәрен һорай.

Арей ҡушаматлы эт хәрби бурыстарҙы үтәүсе медицина батальонының талисманы була. Ул подразделениеға көсөк кенә көйө эләгә. Хәрбиҙәр менән окоптарҙа йәшәй, улар менән бергә хәрби заданиеларға йөрөй.

МХО-ла ҡатнашыусылар әйтеүенсә, эткә алғы һыҙыҡта еңел түгел, шуға күрә хәрбиҙәр уны хәүефһеҙ урынға ебәреү тураһында уйлай башлай. «Волжский» позывнойлы батальон командиры Арейҙы Башҡортостанға ғаиләһенә ебәрергә ҡарар итә.

Яугирҙең ҡатыны Регина подразделение урын алмаштырғанда этте юғалтып ҡуйыуҙан ҡурҡыуҙарын һөйләй. Һәм Арей уның иренә ныҡ эйәләшкән була. Бер аҙна самаһы ҡатын ире менән этте нисек өйҙәренә алып ҡайтыу юлдарын эҙләй. Төрлө ойошмаларға үтенестәр менән мөрәжәғәт итәләр, әммә һөҙөмтәһеҙ. Урындағы гәзиттән Регина Халыҡ фронтының башҡорт йәштәре командаһының Курскиҙа эшләүе тураһында уҡый һәм уларға яҙырға ҡарар итә.

Ирекмәндәрҙең яуабы ҡыҫҡа була: "Ярҙам итербеҙ!" 

Арейҙың сәйәхәте Белгородтан башлана. Халыҡ фронты йәштәре командаһы ирекмәндәре этте поезда Курскиға оҙата, унда уны Башҡортостан гуманитар миссияһында ҡатнашыусылар ҡаршы ала. Эштәре тамамланғас, улар йорт хайуанын командирҙың ҡатынына алып ҡайта.

"Арейға алғы һыҙыҡтан беҙҙең төбәккә тиклем бер нисә мең километр юл үтергә тура килде. Курскиға тиклем поезда ул бер үҙе килде, артабан юл Мәскәүгә Һәм Башҡортостанға ятты. Беҙ уның менән Приют станцияһында төштөк, унан машинала Бәләбәйгә барып еттек. Эт - герой, юлды яҡшы үткәрҙе", - тип һөйләне Халыҡ фронтының Башҡортостандағы йәштәр командаһы координаторы Рөстәм Сәләхетдинов.

Бәләбәйҙә ғаиләнең яңы ағзаһын «Волжский»ҙың ҡатыны һәм ике балаһы ҡаршы алды. Халыҡта әйтеүҙәренсә: "Хәҙер атайҙарының Еңеү менән ҡайтыуын көтөргә ҡалды».

Фото һәм видео: ОНФ.