"Бер ғүмер етмәй икән..." спектакле менән 36-сы театр миҙгеле асылды

"Бер ғүмер етмәй икән..." ("Одной жизни, видно, мало…") спектакле Мостай Кәрим исемендәге Милли йәштәр театрында 36-сы театр миҙгелен асыуҙы билдәләгән сағыу һәм иҫтә ҡалырлыҡ ваҡиғаға әүерелде. Һәм миҙгелде асыу өсөн был тамашаны һайлау осраҡлы түгел: тап 2025 йылдың 25 авгусында, Армия мәҙәниәте көндәре сиктәрендә, тамашасылар патриотизм тураһындағы драманы рус телендәге махсус версияла ҡараны.

Драматург Мөнир Ҡунафиндың пьесаһы буйынса Башҡортостандың атҡаҙанған сәнғәт эшмәкәре, Башҡортостан Республикаһының Ш.Бабич исемендәге дәүләт йәштәр премияһы лауреаты Рөстәм Хәкимов етәкселегендә ҡуйылған спектакль быға тиклем үк тамашасыларҙың йөрәген яулап өлгөргәйне. Әммә Армия мәҙәниәте көндәрен асыу контексында уның яңғырашы айырым көскә һәм әһәмиәткә эйә булды. Бурыс, батырлыҡ һәм тыныслыҡ хаҡы тураһында мәңгелек һорауҙар күтәргән спектакль бөтә алдағы миҙгел өсөн юғары талап ҡуйған ҡеүәтле художестволы фекергә әйләнде.

Актерлыҡ уйыны, оҫта режиссура һәм спектаклдең тәрән мәғәнәһе залда бер кемде лә битараф ҡалдырманы. Тамашасылар ҡаһарманлыҡ тураһындағы тарихҡа шаһит булды, ул ҙур батырлыҡтарҙа ғына түгел, ә көндәлек антҡа тоғролоҡта һәм туғандарса теләктәшлектә лә сағыла.

- Спектакль күңелгә үтеп инде! - тип тәьҫораттары менән уртаҡлашты тамашасы. - Ул миңә һәр көндөң ҡиммәте һәм үҙ идеалдарыңа тоғро булыуҙың мөһимлеге тураһында иҫкә төшөрҙө, бигерәк тә шундай ауыр ваҡыттарҙа.

"Бер ғүмер етмәй икән..." - спектакль генә түгел, ә хәтер, патриотизм һәм мәңгелек кешелек ҡиммәттәренә арналған яңы 36-сы театр миҙгелен асыу символы. Ул, тамашасыларға сағыу премьералар, тәрән кисерештәр һәм онотолмаҫ тәьҫораттар вәғәҙә итеп, алдағы йылға юғары бейеклек талабын ҡуйҙы.

26 августа театрҙа миҙгелде асыуҙың икенсе көнө. Тамашасылар "Ленканы ҡотҡарығыҙ!" драмаһын ҡарап, блокадалы Ленинград атмосфераһына сумасаҡ.  

Фото: фестивалдең ойоштороу комитетынан.