«Файбер Нутришн» компанияһы директоры Тимур Ғарифуллин Ишембай районында «Алға» махсус иҡтисади зонаһы биләмәһендә аҙыҡ сүстәре етештереү буйынса завод төҙөү проектын тәҡдим итте. Уны төҙөүгә 5,4 миллиард һум аҡса һалырға планлаштыралар. Етештереү ҡеүәте йылына 5,6 мең тонна күҙәнәкле матдә һәм 1,5 мең тонна пектин матдәһе тәшкил итәсәк. Уларҙы шәкәр сөгөлдөрө һығынтыһынан алалар һәм мал аҙығы әҙерләгәндә компонент сифатында ҡулланалар. Шулай итеп, предприятие төбәктең шәкәр заводтары продукцияһын эшкәртә һәм урындағы малсылыҡ хужалыҡтарына мал аҙығы бирә ала. Инвестор Башҡортостандың үҫеш корпорацияһы ярҙамында төҙөлөш өсөн майҙансыҡ һайлаған да инде. Эштәр 2024 йылдың йәйендә башлана. 2026 йылда завод эшләй башлағас, унда 80-дән ашыу кеше эшләйәсәк.
Тағы бер ауыл хужалығы проекты – Благовещенда премикстар (биологик актив матдәләр) һәм малсылыҡ өсөн аҡһым-витамин-минераль комплекстар етештереү буйынса завод төҙөү. Уның тураһында «Покровский» агросәнәғәт комплексының генераль директоры Константин Щербинин һөйләне. Сеймал сифатында үҙ көсө менән үҫтерелгән иген һәм ҡуҙаҡлы иген культуралары файҙаланыласаҡ. Инвесторҙар үҫемлекселек продукцияһы етештереү өсөн 2,3 мең гектар ерҙе ҡуртымға ала.
Проектҡа инвестицияларҙың дөйөм күләме – 398 миллион һум. Йылына 40 мең тонна продукция етештереү ҡеүәтенә эйә булған яңы завод төбәктә беренсе ошондай предприятие буласаҡ һәм илдең башҡа төбәктәренән килтерелгән тауарҙарҙы алмаштырырға мөмкинлек бирәсәк. Ә эре ҡулланыусыларҙың береһе Благовещен районында урынлашҡан «Турбаҫлы бройлерҙары» фабрикаһы буласаҡ. Фекер алышыу йомғаҡтары буйынса проект һалым льготалары менән өҫтөнлөклө статус ала. Өҫтәмә рәүештә инвесторға техника һәм ҡорамалдар һатып алыуға сығымдарҙың бер өлөшөн ҡаплайҙар.
«Азимут» компанияһы директоры Кирилл Горбунов Өфөнөң Нуғай ауылында юл буйы сервис комплексын төҙөү пландары хаҡында һөйләне. Ул Өфө–Охлебинин юлы буйлап урынлашасаҡ һәм автомобиль газ тултырыу компрессор станцияһы (АГНКС), магазин, автомобилдәргә сервис хеҙмәтләндереү пункты менән парковка һәм килеүселәр өсөн ял итеү зонаһын үҙ эсенә аласаҡ. Проекттың дөйөм хаҡы – 120 миллион һум. Майҙансыҡта төҙөлөш-монтаж эштәре башланған һәм АГНКС өсөн ҡорамалдарҙың бер өлөшө ҡуйылған. Комплексты 2023 йылдың аҙағына тиклем асырға планлаштыралар.
«Нарыҫтау» туристик комплексын киңәйтеү буйынса башланғыс тураһында проекттың кураторы Альберт Сәфәрғолов һөйләне. Турбаза 2019 Йылда Миәкә районының Сергеевка быуаһы буйында төҙөлгән. Уның территорияһында 25 кеше өсөн тирмәләр, мунса комплексы, кафе һәм мангаллы беседкалар ҡуйылған. Инвестиция проектының икенсе этабы сиктәрендә туристар өсөн 36 урынлыҡ ҡунаҡхана комплексы төҙөргә планлаштыралар. Был 41 миллион һум күләмендә аҡса талап итәсәк. Республиканың инвестиция комитеты тәҡдим ителгән проектты хупланы һәм уға өҫтөнлөклө статус бирҙе. Уны тормошҡа ашырыу сиктәрендә инженер инфраструктураһын булдырыуға сығымдарҙың бер өлөшөн ҡаплаясаҡтар.
Радий Хәбиров шулай уҡ инвесторҙарға турбаза биләмәһендә глэмпинг йәки ҡунаҡтарҙы урынлаштырыу өсөн башҡа форматтағы капиталь булмаған объекттар булдырыу мөмкинлеген ҡарарға тәҡдим итте. «Туризм» милли проекты сиктәрендә бындай проекттар субсидия формаһында дәүләт ярҙамы ала ала. Альберт Сәфәрғолов был йүнәлештә мөмкин булған үҫеш варианттарын эшләйәсәген әйтте.
https://glavarb.ru/rus/press_serv/novosti/168094.html