Әмир ағай менән Сәкинә еңгәй ҙә ҡыуанды

Баймаҡ районының Үрге Иҙрис ауылына газ үтте. Ошо шатлыҡлы ваҡиғаны ауыл халҡы күптән көттө.

Ҡунаҡтар, ауыл кешеләре урамда йыйылғас, ауылдың хөрмәтле ғаиләһе - Сәкинә һәм Әмир Сәғәҙиевтәрҙең өйөнә символик рәүештә газ тоташтырыу тантанаһы булды. Был уларҙың 50 йыллыҡ ғүмер байрамы мәленә лә тап килде. Райондан, газ ойошмаһынан килгән етәкселәр сығыш яһаны, алдынғы газ хеҙмәткәрҙәренә рәхмәт һүҙҙәре яңғыраны, сәхнәлә концерт уҙҙы, урамда әйлән-бәйлән ойошторолдо.

Әмир Сәғәҙиев - рәссам, иретеп йәбештереүсе, ҡыҫҡаһы, алтын ҡуллы оҫта. Баймаҡ районы хужалыҡтарында ла, Себерҙә лә эшләгән. Ауыл биләмәһе ауылдарындағы стелалар, обелискылар, аркаларға уның ҡул көсө күп һалынған. 

Был төбәктә йәнә Темәстең бер биҫтәһе, Әмин, Түбәнге Иҙрис, Ҡолсора, Муллаҡай ауылдары зәңгәр яғыулыҡҡа тоташтырылды. 

Фото: Рәил Мусин.