Йорт хайуандарын яһалма интеллект күҙәтәсәк

Өфөлә Халыҡ-ара бизнес аҙналығының «Яңы ысынбарлыҡта иҡтисад тармаҡтарын һанлаштырыу: һанлы суверенитетҡа курс» панель сессияһында Башҡортостандың ауыл хужалығы министры вазифаһын башҡарыусы Илшат Фәзрахманов бөгөн республикала әҙерләнгән яһалма интеллект нигеҙендә һөт фермаларына идара итеү системаһы тураһында һөйләне. Спикер яңылыҡтың киләһе йылда уҡ баҙарға сығыуын иғлан итте.

 - Киләһе йылда беҙҙә ҙур индустриаль фермаларҙа камералар ҡуйыла һәм беҙҙә һәр йорт  хайуаны онлайн режимда күҙәтеү аҫтында торасаҡ. Яһалма интеллект хайуандың эталонын асыҡлай һәм камералар буйынса ҡайһыһының был эталонға тап килмәүен билдәләй. Яһалма интеллект өс-дүрт көндә йорт хайуанының үҙен тотошо буйынса сирҙең башланыуын билдәләп, ветеринарҙы иҫкәртә, - тип һөйләне Илшат Фәзрахманов.

Министр вазифаһын башҡарыусы һүҙҙәренсә, был эшләнмә баҙарҙа тәүге комплекслы һәм иң яҡшыһы буласаҡ.   Башҡортостандың яһалма интеллекты хайуандарҙы ҡарауҙан тыш, яҡтыртыуҙы, елләтеүҙе, санитар-эпидемиологик хәүефһеҙлекте күҙәтеүҙе лә контролдә тота ала.

 Илшат Фәзрахманов бөгөнгө көндә был өлкәләге иң мөһим проблема – ярҙамсы һәм контролдә тотоу системаларының күп булыуы хаҡында һөйләне. Ведомство етәксеһе аңлатыуынса: элеваторға эләгер алдынан бер килограмм иген «Иген» мәғлүмәт системаһына индерелә, мал аҙығы һәм һөт итеп эшкәртелгән иген «Меркурий» системаһына күсә, ә һөт заводында Мәғлүмәт DataMatrix «Ғәҙел билдә»гә күсерелә, магазиндан мәғлүмәт һалым системаларына китә. Һәр килограмм, һәр гектар, һәр литр һөт бер-береһе менән интеграцияланмаған төрлө ҡушымталар тарафынан иҫәпкә алына.

Башҡортостандың ауыл хужалығын ғына түгел, бөтә сәнәғәтте һанлаштырыуҙа алдынғы булыуын республика дәүләт идаралығының һанлы үҫеш министры вазифаһын башҡарыусы Геннадий Разумикин да раҫланы. Ул сессияла видеоконференцбәйләнеш тәртибендә ҡатнашты һәм үҙенең сығышында төбәктә IT-тармаҡҡа ярҙам сараларына иғтибарҙы йүнәлтте.

 - Төбәк компаниялары 2022 йылдан алып 350 миллион һум самаһы льготалы кредит алды. Ярҙамдың мөһим сараһы – бында ла республика буйынса ауыл хужалығы алдынғы  – ул компанияларға илебеҙҙең IT-технологияларын индереүгә бирелгән төрлө гранттар. Һуңғы биш йылда компанияларыбыҙ 400 миллион һум самаһы ошондай грант алды тип әйтергә була, - тип һөйләне Геннадий Разумикин

 Панель сессияла шулай уҡ РФ-тың ҠХР-ҙағы сауҙа вәкиллеге ҡарамағындағы Башҡортостан вәкиллеге етәксеһе Флүр Әсәҙуллин, Shenzhen Said Information Technology компанияһының директорҙар советы рәйесе Ся Чэнь, «Ростелеком» ПАО-һы Башҡортостандағы корпоратив һәм дәүләт сегменты менән эшләү буйынса директоры Юлия Аксенова, Башҡортостандың Мәғлүмәт технологияларын үҫтереү ассоциацияһы вәкиле Виктор Тимошин һәм «Башҡортостан Республикаһында инновацияларға булышлыҡ итеү үҙәге»  ойошмаһы директоры Руслан Шәймөхәмәтов ҡатнашты.

Етештереүҙең иң боронғо, яй ауыл хужалығы тармағы бөгөн юғары технологиялы һанлы системалар интеграцияһының иң юғары нөктәһендә тора тип билдәләнде.

https://ibw-bashkortostan.com/news/17241/