Андрей Назаров Баймаҡ районы эшҡыуарҙары менән осрашты

Башҡортостан Республикаһы Хөкүмәте Премьер-министры Андрей Назаров Баймаҡ районының бизнес-берләшмәһе менән осрашыу үткәрҙе.

Район яҡшы үҫешә, әммә бергәләп эшләүҙе талап иткән мәсьәләләр бар, тип билдәләне Министрҙар кабинеты башлығы. Төбәк етәкселегенең республика райондарында һәм ҡалаларында эшҡыуарҙар менән осрашыуҙарының маҡсаттарының береһе ошо, тип өҫтәне ул.

Хәтерегеҙгә төшөрәбеҙ, ошондай осрашыуҙарҙы даими рәүештә уҙғарырға Башҡортостан Башлығы Радий Хәбиров быйыл йыл башында ҡушҡайны.

- Башта беҙ бизнес, айырыуса райондарҙа артыҡ кәртәләрһеҙ үҫә алырлыҡ шарттар булдырырға тырыштыҡ. Республика инвестиция сәғәттәре принцибы буйынса муниципалитеттарҙа Эшҡыуарлыҡ сәғәттәре эшләй.

Мәҫәлән, Баймаҡта 25 миллиард һумдан ашыу инвестиция һалынған 67 проект ҡаралған. Беҙ һеҙҙә бәләкәй һәм урта эшҡыуарлыҡтың йылына өс процентҡа артыуын күрәбеҙ, был бында бизнестың уңайлы булыуын күрһәтә. Гранттар, субсидиялар алыусылар ҙа бар. Әммә улар тағы ла күберәк булыр ине, бында һеҙҙең яҡтан әүҙемлек кәрәк, - тип мөрәжәғәт итте Премьер-министр.

Баймаҡ районында 1268 бәләкәй эшҡыуарлыҡ субъекты теркәлгән (йыл башынан алып +49). Төп көс һалыу өлкәһе сауҙа. Бөтә эшҡыуарҙарҙың биштән бер өлөшө тиерлек ауыл хужалығында мәшғүл. Эшкәртеү производстволарына туғыҙ проценттан ашыу тура килә. Үҙмәшғүлдәр һаны 376 кешегә артҡан. Туризм өлкәһендә 15 бәләкәй эшҡыуарлыҡ субъекты эшләй.

Эшҡыуарҙарҙың Хөкүмәт ағзаларына һорауҙары ерҙе рәсмиләштереүгә, юл буйы сервисы һәм ағас эшкәртеү өлкәһендә ярҙам сараларына, юлдарҙы ремонтлауға, төҙөкләндереү буйынса дәүләт программаларында ҡатнашыуға ҡағылды.

Иҡтисади үҫеш министрлығы етәксеһе Рөстәм Моратов беренсе Креатив индустриялар сәғәтендә яңғыраған яңы башланғыс хаҡында һөйләне. Бөтә муниципалитеттарҙа ла пилот форматында ижади зоналар булдырыласаҡ. Июнь аҙағына тиклем унда ҡатнашыусылар өсөн эксперименталь хоҡуҡи режимда ярҙам саралары булдырыласаҡ.

- Шунда уҡ ғариза бирегеҙ. Башҡортостан Башлығы бындай башланғыстар менән бик ҡыҙыҡһына, - тип кәңәш бирҙе бизнесменға беренсе вице-премьер.

Хөкүмәт менән Баймаҡ районының бизнес-берләшмәһе ағзаларының тура диалогында 120-гә яҡын эшҡыуар ҡатнашты. Осрашыу аҙағында урындағы эшҡыуарҙарҙы хөкүмәт наградалары менән бүләкләү тантанаһы үтте.

Сығанаҡ: https://pravitelstvorb.ru/news/26820/