Билдәле булыуынса, иртән Ҡазан ҡалаһына бер нисә БПЛА һөжүм итте. Сәғәт ярым эсендә алты дрон ҡаланың кешеләр йәшәгән торлаҡтарына һәм юлдарға зыян килтерҙе. Берәүһе сәнәғәт зонаһына йүнәлтелгән була, тағы берәүһен йылға өҫтөндә бәреп төшөрәләр.
Тәүге дрон 37 ҡатлы йортҡа төбәлә. Ул 31-се ҡаттағы кеше йәшәмәгән фатирға тәҙрәне ярып инеп шартлай. Янғын башлана. Әммә бәләкәй утты тиҙ һүндерәләр. Кешеләр янғын тревогаһы тураһында хәбәр ала һәм йыйынып тышҡа сыға башлай.
40 минуттан йортҡа тағы бер дрон һөжүм итә. Быныһында 29-сы ҡаттағы кеше йәшәгән фатирға. Һәм көслө янғын башлана. Бәхеткә күрә, был "Лазурные небеса" торлаҡ комплексының күп өлөшөн офистар биләгән була. Ә бөгөн шәмбе - ял көнө һәм хеҙмәткәрҙәр эш урындарында булмай.
