Өфө үҙәгендә шартлау

Бөгөн иртән Өфөлә Ладыгин урамындағы йортта шартлау яңғырай. Баҡһаң, икенсе ҡаттағы бер фатирҙа газ шартлай һәм янғын сыға. Газ менән ағыуланған һәм йөҙө бешкән 64 йәшлек хужаны һәм аяғы йәрәхәтләнгән 31 йәшлек ҡунаҡ ҡатынды дауаханаға алып китәләр.

Шартлау тулҡыны подъездағы ишектәрҙе, тәҙрәләрҙе, балконды атып бәрә. Уларҙың ярсыҡтары ихатала торған машиналарҙы зарарлай. 

Урындағы халыҡ әйтеүенсә, газ шартлаған фатирҙа инвалид эскесе йәшәй. Күршеләре күптән инде хәлдең насар тамамланырын көткән. Йортта йәшәүселәр бер нисә тапҡыр полиция саҡырта, әммә бының фәтүәһе булмай.

Фажиғә булыр көндә лә подъезда газ еҫе тарала. Кемдер белгестәрҙе саҡырта. Бер видеояҙмала шартлауға тиклем бер минут элек подъезға махсус кейемдәге хеҙмәткәрҙең ингәне күренә. 

Янғын һүндерелә. 20 кеше фатирҙарынан үҙаллы сыға, дүртәүҙе ғәҙәттән тыш хәлдәр хеҙмәткәрҙәре ҡотҡара. Хәҙер урында ашығыс хеҙмәттәр һәм тәфтишселәр эшләй. Йорттағы кешеләрҙеваҡытлыса 64-се мәктәпкә күсерәләр.

Сығанаҡ, фото: МЧС РБ, Мэш Бэтэш.