Һаҡ булығыҙ: көслө ел сыға

Киләһе ике көндә һауа торошоноң боҙолоуы тураһында иҫкәртә республика халҡын Ғәҙәттән тыш хәлдәр министрлығының төбәк идаралығы. Көслө ел сыға, ҡар ҡатыш ямғыр яуа.

Бөгөн кистән иртәгә сәғәт киске 8-ҙәргә тиклем, шулай уҡ 6 апрель көн аяҙлы-болотло була. Урыны менән бер аҙ ямғыр яуа, төндә ҡайһы бер райондарҙа ҡар яуыуы ихтимал. Ел көньяҡтан, көньяҡ-көнбайыштан секундына 5-10 метр тиҙлектә иҫә, көндөҙ 18 метр тиҙлеккә лә етә.Ошоға бәйле экстрен хеҙмәттәр көслө шторм булыуы тураһында иҫкәртә.

Метеорологтар мәғлүмәттәре буйынса, бөгөн төндә һауа температураһы 0...+5 градус, төньяҡ райондарҙа -5 градус, көндөҙ +14...+19, төньяҡ райондарҙа +9 градус йылы була. Ямғыр яуғанда юлдарҙың айырым учаткаларында күреү мөмкинлеге 1-2 км-ға ғына етә.

Өфөлә лә көслө ел сығыуы фаразлана (секундына 5-10 метр, урыны менән 18 метр). Төндә +3...+5 градус, көндөҙ +16...+18 градус йылы.

Ләйсән Үтәғолова фотоһы.