Белорет районында социаль-мәҙәни үҙәк асылды

 «Мәҙәниәт» милли проектының «Мәҙәни мөхит» федераль проектын (федеральный проект «Культурная среда» национального проекта «Культура») тормошҡа ашырыу сиктәрендә Белорет районының Тирлән ауылында яңы социаль-мәҙәни үҙәк асылды.

Тирлән халҡы һәм бөтә Белорет районы өсөн был ысын байрам. 3,2 мең квадрат метрлыҡ заманса бинала ауыл мәҙәниәт йорто, балалар сәнғәт мәктәбе һәм ике китапхана урынлашҡан. Беренсе ҡатта күргәҙмә зонаһы, гардероб, касса, грим һәм костюм бүлмәһе, 300 урынлыҡ тамаша залы, сәхнәлә заманса яҡтылыҡ һәм тауыш ҡорамалдары ҡуйылған. Икенсе ҡатта 130 урынлыҡ балалар сәнғәт мәктәбе, тауыш яҙҙырыу студияһы, яҡтылыҡ һәм тауыш операторҙары, тренажер залы, санузеллы кейенергә бүлмәләр урынлашҡан. Бина һаулыҡ мөмкинлектәре сикләнгән кешеләр өсөн яраҡлаштырылған. Мәҙәниәт йорто базаһында 19 клуб (театр, бейеү, вокал, инструменталь) һәм һәүәҫкәр берләшмәләр (биҙәү-ҡулланма сәнғәте, һаулыҡ клубтары, ял көндәре, ҡатын-ҡыҙҙар клубы) эшләй. Фольклор йүнәлеше һәм ирекмәндәр хәрәкәте бар. Тирлән балалар сәнғәт мәктәбендә балалар гармун, аккордеон, фортепиано, скрипка, һынлы сәнғәт, синтезатор, гитара кластары буйынса шөғөлләнә, иртә эстетик үҫеш төркөмө бар.

"Тирләндәрҙе ихлас күңелдән ҡотлайым һәм социаль-мәҙәни үҙәктә яңы йондоҙсоҡтар, ижади коллективтар тыуыуын теләйем. Ә инде ғәмәлдәгеләре уңышлы үҫешкән. Тирлән ҡалаһындағы заманса үҙәк яңы таланттарҙы асырға, байрам сараларын уңайлы шарттарҙа үткәрергә ярҙам итер, тип ышанам. Ә иң мөһиме - артабан да күп милләтле мәҙәниәтебеҙҙе һәм традицияларыбыҙҙы һаҡлап ҡалыу", - тип билдәләне Белорет районы хакимиәте башлығы Андрей Иванюта.

Хәтерегеҙгә төшөрәбеҙ, милли проекттар Рәсәй Президенты Владимир Путин инициативаһы буйынса 2019 йылдан тормошҡа ашырыла.

Фото: Белорет районы хакимиәте.