Беҙ – һеҙгә, һеҙ – беҙгә...

1996 йылда ике дәүләт президенттары “Рәсәй һәм Беларусь берләшмәһе ойошторолоуы тураһында” килешеү төҙөй. Был документ илдәрҙең үҙ-ара берләшеү процесына башланғыс һала. 1997 йылдың 2 апрелендә иһә Рәсәй һәм Беларусь союзы тураһында килешеүгә ҡул ҡуйыла. Дуҫлыҡ 1998 йылдың 25 декабрендә ҡабул ителгән Декларация менән нығытыла.

Ошо йылдар арауығында ике дәүләт араһында килешеү – хоҡуҡи база формалашҡан, йәғни ике яҡтың хеҙмәт­тәшлек өлкәһендә мөһим аспект­тарҙы көйләгән 150-нән ашыу доку­ментҡа ҡул ҡуйылған. Союздаш дәүләт сиктәрендә, граждандар тиңле­ген тәьмин итеү, берлектәге оборона сәйәсәтен уҙғарыу, килешелгән тышҡы сәйәси хеҙмәттәшлек, күләмле иҡти­сади һәм фәнни-техник процестарҙы бойомға ашырыу өсөн бөтә шарттар ҙа тыуҙырылған.

Союздаш дәүләттәрҙең үҙ-ара уңыш­лы хеҙмәттәшлеге Бойондороҡһоҙ Дәүләттәр Берләшмәһе киңлегендә бер­ләшеү процесын үҫтереүгә булышлыҡ итә. Ике илдең эш­мә­кәрлек һөҙөмтәһе Таможня союзын, Рәсәй, Беларусь һәм Ҡаҙағстан бер­ҙәм иҡтисад киңлеген, Евразия иҡтисад берлеген төҙөүҙә файҙаланыла.

Башҡортостан һәм Беларусь ара­һындағы сауҙа-иҡтисади, фәнни-техник һәм мәҙәни хеҙмәттәшлек тураһында килешеү 1999 йылда төҙөлә һәм эшлекле аралашыу бөгөнгәсә дауам итә.

Башҡортостандың Тышҡы иҡтисад бәйләнештәре буйынса дәүләт комитеты мәғлүмәттәренә ярашлы, респуб­ликаның тышҡы сауҙа әйләнешендә Беларусь Республикаһы икенсе урынды биләй (12,8 процент). Һандар теле менән әйткәндә, 2017 йылда төбәк беларустарға 351 878,3 мең долларлыҡ тауар оҙатҡан, былтыр ул 592 264,3 мең долларға еткән (үҫеш – 68,3 процент). Шул уҡ ваҡытта Башҡортостанға тауар индереү буйынса ла алға китеш күҙәтелә: 2017 йылда 86 448,7 мең долларлыҡ тауар алынған, былтыр ул 97 093,0 мең доллар тәшкил иткән (үҫеш – 12,3 процент).

Ике республика араһындағы тышҡы сауҙа әйләнеше 2017 йылда 438 327,0 мең доллар булһа, былтыр 689 357,3 мең долларға тиклем артҡан (үҫеш – 57,3 процент).

Башҡортостан беларустарға яғыу­лыҡ-энергетика тауарҙарын күпләп һата, ул экспорттың нигеҙен тәшкил итә – 85,1 процент, унан ҡала химия сәнәғәте тауарҙары – 10,8 процент, металдан әйберҙәр – 2,2 процент. Беҙ уларҙан машиналар эшләү сәнәғәте тауарҙарын күпләп алабыҙ (55,3 процент), ағас әйберҙәр – 21,3 процент, туҡыма әйберҙәр – 11,5 процент, химия сәнәғәте тауарҙары – 2,3 процент.

Әле төбәктә Беларусь Республика­һынан килгән капитал ҡатнашлығында һаулыҡ һаҡлау, төҙөлөш, сауҙа, һыу транспорты эшмәкәрлеге, электр приборҙары һәм ҡорамалдары етештереү, ағас әйберҙәр эшләү, тауар ташыу, хоҡуҡ, архитектура, реклама, күсемһеҙ милек, йәшелсәне күмәртәләп һатыу өлкәһендә эшләгән 21 предприятие бар.

2016 йылда үҙ-ара хеҙмәттәшлекте үҫтереү мәсьәләләре буйынса эш төркөмө ойошторолған. Сиратлап йыл һайын ултырыштар уҙғарыла. 2001 йылдан Өфөлә Беларусь Республи­каһының Рәсәйҙәге илселегенең бүлексәһе асылған.

Иглин районында беларустар диас­пораһы район халҡының 15 процентҡа яҡынын тәшкил итә. Балтика ауылында “Балтика” тарихи-мәҙәни үҙәге эшләй. Унда йыл һайын беларустарҙың милли байрамдары уҙғарыла. Балтика ауыл мәҙәниәт йортоноң “Сябры” белорус халыҡ йыр ансамбле төбәктә танылыу алған. Республиканың ике мәктәбендә белорус теле өйрәнелә. Шулай уҡ Башҡорт дәүләт университеты һәм Барановичи дәүләт университеты, Баш­ҡортостан дәүләт медицина университеты һәм Витебск, Гомель дәүләт ме­дицина университеттары, Өфө дәү­ләт нефть техник университеты һәм Полоцк дәүләт университеты араһында хеҙмәттәшлек тураһында килешеүҙәр төҙөлгән. Әлеге мәлдә республиканың юғары уҡыу йорттарында Беларустан алты студент белем ала.