Мәңгелек ҡиммәттәр бер

Фестивалдә Башҡортостан, Корея, Македония, Ҡаҙағстан, Беларусь, Чили, Ҡырғыҙстан, Шри-Ланка, Сенегал вәкил­дә­ре ҡатнаша. Уларҙы респуб­ли­каның мәҙәниәт министры Әминә Шафиҡова, Өфө ҡала­һы хакимиәте башлығы урын­баҫары Илгиз Насретдинов сәләмләне.

“Төрлө мәҙәниәтле, төрлө динле халыҡтарҙың осрашыуы, берләшеүе, бында сиктәр булмауы – шәп күренеш. Мәң­гелек ҡиммәттәр бер. Һәм беҙ барыбыҙ ҙа тик тыныслыҡ яҡ­лы”, – тине Әминә Ивний ҡыҙы һәм сит ил ҡунаҡтарын 2020 йылда Өфөлә үтәсәк Бөтә донъя фольклориадаһына саҡырҙы.

Илгиз Диҡҡәт улы үҙ сы­ғышында “Берҙәмлек” фес­тива­ленең тыныслыҡ, дуҫлыҡ, изгелек байрамы булыуын билдәләне.

“Беҙҙең төп бурыста­рыбыҙ­ҙың береһе – тыуған ергә, та­рих­ҡа һөйөү тәрбиәләү”, – тине ул.

Сарала беҙҙең “Мираҫ” ха­лыҡ фольклор ансамбле сығыш яһаһа, Белоруссиянан “По­лешуки” атҡаҙанған халыҡ һә­үәҫкәрҙәре коллективы, Ҡыр­ғыҙстандан “Нур”, Македониянан “Александр Турундзев” төркөмдәре сәхнәне биҙә­не. “Таджиниса” ҡаҙаҡ халыҡ бейеүҙәре ансамбле менән “Юксал” уй­ғыр музыкаль коллективы тамашасыны дала моңона ҡо­йондорһа, шағирҙар иле тип йөрөтөлгән Чилиянан килгән йырсы, шағирә-импровизатор Сессилия Асторганың тормош иптәше менән сығышы кү­ңелдең нескә ҡылдарын сиртте. Шри-Ланканан “Рангаранга” академия бейеүҙәре ансамбле, Кореяның Тегу ҡа­лаһы музыкаль оркестрының дүрт ха­лыҡ ҡоралдарында уйнауы, Сенегал вәкилдәре “Африка арыҫландары” традицион музыка оркестры сиктәрендә барабансылар, бейеүселәр, хатта акробатсылар сығышы байрамды тулы бер шоуға әйләндерҙе.

Башҡортостан халҡы Рәсәй көнөн һәм Өфө ҡалаһының 445 йыллығын билдәләгән байрамда “Берҙәмлек” халыҡ-ара милли мәҙәниәт фестивале В.И. Ленин майҙанында сығыш яһап, ҡала халҡын һәм килгән ҡунаҡтарҙы әсир итте. Бындай көндә халыҡтар дуҫлығынан, төрлө мәҙәниәттәрҙең берлә­шеүенән дә матур күренеш бармы икән?!