Мәләүез районында - яңы хакимиәт башлығы

Район хакимиәтенең ултырыштар залында Башҡортостан Республикаһының алтынсы саҡырылыш Мәләүез районы муниципаль район советының сираттағы сессияһы үтте. Ултырыш эшендә Башҡортостан Республикаһы башлығының муниципаль берәмектәр менән үҙ-ара эш итеү буйынса идаралығы начальнигы Юрий Александрович Коземаслов, Башҡортостан Республикаһы йәмәғәт именлеге ведомство-ара советы аппараты етәксеһе урынбаҫары Валерий Анатольевич Кургузов, район хакимиәте башлығы урынбаҫарҙары һәм структура бүлексәләре етәкселәре, ауыл биләмәләре башлыҡтары, райондың һәм ҡаланың эре предприятиелары етәкселәре, киң мәғлүмәт саралары вәкилдәре ҡатнашты.

Депутаттар бер нисә мөһим мәсьәләне ҡараны һәм улар буйынса тейешле ҡарарҙар ҡабул итте. Ултырыштың көн тәртибендә тәүгеләрҙән булып Башҡортостан Республикаһы Мәләүез районы муниципаль районы хакимиәте башлығын контракт буйынса тәғәйенләү мәсьәләһе торҙо. Конкурс комиссияһы эшенең йомғаҡтары менән уның рәйесе Валерий Кургузов таныштырҙы. Депутаттар бер тауыштан Зәбир Таһирйән улы Ғабдуллин кандидатураһы өсөн тауыш бирҙе.

Ғабдуллин Зәбир Таһирйән улы 1976 йылда Башҡортостан Республикаһының Ҡалтасы районы Яңы Аткүл ауылында тыуған. Юғары белемле. 1998 йылда Башҡорт дәүләт университетын, 2009 йылда Ҡазан дәүләт архитектура-төҙөлөш университетын тамамлаған.

Хеҙмәт эшмәкәрлеген 1993 йылда «Ҡалтасы ауыл хужалығы техникаһы» асыҡ акционерҙар йәмғиәтендә слесарь уҡыусыһы булып башлай. 1998 - 2000 йылдарҙа - «Ҡалтасы ауыл хужалығы техникаһы» йәмғиәте инженер-дефектсыһы. 2000 - 2008 йылдарҙа - биологик таҙартыу ҡоролмалары цехын ремонтлау буйынса мастер, ремонт буйынса мастер, өлкән мастер, һыуҙы ағыҙыу цехы начальнигы, йорт эсендәге селтәрҙәр начальнигы, күтәреү, һыу биреү цехы начальнигы, «Нефтекамскводоканал» муниципаль унитар предприятиеһында цех начальнигы.

2008 - 2010 йылдарҙа - Нефтекама ҡалаһы «УЖХ» яуаплылығы сикләнгән йәмғиәтенең 14-се разрядлы баш инженеры, 16-сы разрядлы баш инженеры.

2010 - 2012 йылдарҙа - Нефтекама ҡалаһы «УЖХ» яуаплылығы сикләнгән йәмғиәтенең баш инженеры.

2012 - 2017 йылдарҙа - капиталь төҙөлөш һәм төҙөкләндереү бүлеге начальнигы, йәшәйеште тәьмин итеү һәм төҙөкләндереү бүлеге начальнигы, Нефтекама ҡалаһы ҡала округы хакимиәте башлығының йәшәйеште тәьмин итеү буйынса урынбаҫары вазифаһын башҡарыусы. 2018 - 2020 йылдарҙа – Нефтекама ҡалаһы ҡала округы хакимиәте башлығының беренсе урынбаҫары.

2020 йылдың 20 ноябренән 2024 йылдың 19 декабренә тиклем – Башҡортостан Республикаһы Ҡалтасы районы хакимиәте башлығы. Депутаттар шулай уҡ Башҡортостан Республикаһы Мәләүез районы муниципаль районының 2025 йылға һәм 2026 һәм 2027 йылдарҙың план осорона социаль-иҡтисади үҫешен күҙаллау, Башҡортостан Республикаһы Мәләүез районы муниципаль районының 2025 йылға һәм 2026 һәм 2027 йылдарҙың план осорона бюджеты һәм башҡа мәсьәләләрҙе ҡараны һәм ҡарарҙар ҡабул итте.

Фото күрһәтелгән сығанаҡтан:

https://kungak.ru/news/novosti/2024-12-20/m-l-ez-rayonynda-ya-y-bashly-4061430