Юғары технологиялы урология һәм хирургия өлкәһендә уҡытыу үҙәге буласаҡ

Өфөлә Юғары технологиялы урология һәм хирургия өлкәһендә Рәсәй-Италия уҡытыу үҙәген булдырыу тураһында килешеүгә ҡул ҡуйылды. Башҡорт дәүләт медицина университеты һәм Лариана дауаханаһының урология һәм хирургия бүлеге (Комо, Италия) килешеү төҙөнө. Документҡа БДМУ ректоры, Рәсәй фәндәр академияһы академигы, профессор Валентин Павлов һәм Лариана дауаханаһының урология һәм хирургия бүлеге мөдире доктор Джорджио Боццини ҡул ҡуйҙы.

Тантана «Өфөлә онкоурология аҙналығы» халыҡ-ара форумы сиктәрендә үтте. Форумдың эшлекле саралары - Вуз-ара студенттар кампусы майҙансыҡтарында, практик өлөштәре, «тере хирургия» форматында оҫталыҡ дәрестәре БДМУ клиникаһы базаһында үтә.

- Бөгөн беҙҙең университет - Петербург халыҡ-ара иҡтисади форумының бәләкәй сағылышы. Килешеүҙәргә ҡул ҡуябыҙ, Африканан, Көньяҡ Африка Республикаһы, Нигерия, Мысыр, Төркиә, Берләшкән Ғәрәп Әмирлектәренән ҙур халыҡ-ара десант ҡабул итәбеҙ. Улар беҙҙә операциялар яһай, студенттарға лекциялар уҡый, бөгөн вуз-ара студенттар кампусы майҙансығында, университеттың клиник базаларында эшләгән Рәсәйҙең алдынғы профессорҙары менән тәжрибә уртаҡлаша. Беҙ яңы технологиялар булдырырға, бергәләп яңы дарыуҙар эшләргә, аҙ өйрәнелгән ауырыуҙарҙың патогенезын тәрәнерәк аңларға теләйбеҙ. Һәм, әлбиттә, фәнде туҡтатып булмай. Университетыбыҙҙың итальян коллегалары менән хеҙмәттәшлеге урология, онкология проблемалары, репродукция өлкәһендә донъя фәненә ҙур өлөш индерәсәк, – тине БДМУ ректоры, Рәсәй фәндәр академияһы академигы, профессор Валентин Николаевич Павлов.

Үҙәк эшмәкәрлеге төп өлкәләргә йүнәлтеләсәк. Эндоурология өлкәһендә алдынғы методикаларға, шул иҫәптән простата биҙенең яҡшы сифатлы гиперплазияһын, бәүел ташы ауырыуын һәм бәүел юлы шештәрен дауалау өсөн лазер технологияларын өйрәнеү планлаштырыла. Лапароскопия һәм робот-ассистент хирургия йүнәлешендә табиптар онкоурологияла һәм башҡа урология йүнәлештәрендә аҙ инвазив операциялар күнекмәләрен камиллаштырасаҡ. Юғары технологиялы медицинаның башҡа мөһим тармаҡтарын да үҫтереү күҙаллана: онкоурология, реконструктив урология, дауалауға шәхси ҡараш кеүек йүнәлештәр.

Рәсәй һәм Италия яҡтары белем биреү программалары, белгестәр менән алмашыу һәм стажировкалар, берлектәге ғилми-тикшеренеү эшмәкәрлеге, Башҡортостандың практик һаулыҡ һаҡлау өлкәһенә яңы донъя медицина технологияларын һәм дауалау стандарттарын индереү, консультация ярҙамы аша хеҙмәттәшлекте үҫтерәсәк.

Сығанаҡ: https://pravitelstvorb.ru/news/26986/