Тағы бер блогер ябығыр өсөн ашҡаҙанына операция яһатҡан

Стәрлетамаҡтан блогер ашҡаҙанын ҡырҡтырып бәләкәсәйтеү буйынса операция яһатҡан һәм ныҡ ҡына ябыҡҡан.

Әлиә Салауатова ғаилә, тормош тураһындағы шаян видеолары менән билдәле. Ул ике етди операция тураһында һөйләгән: йөҙөн тарттырыу һәм ашҡаҙанын бәләкәсәйтеү хаҡында. Ябығырға теләп, диеталарҙа ултырып һәм физик күнекмәләр эшләп һөҙөмтәгә өлгәшә алмағас, Әлиә ашҡаҙанға операция яһатырға була. Әммә блогер шуны билдәләй: бер ниндәй хирургик ғәмәл дә үҙ-үҙеңде контролдә тотмайынса яҡшы һөҙөмтә бирмәйәсәк. Операциянан һуң ул дөрөҫ туҡлана башлай һәм кешеләр менән ошондай рецептар менән уртаҡлаша.

Әлиә операцияға тиклемге һәм унан һуңғы ауырлыҡтар тураһында асыҡтан-асыҡ һөйләй. Блогер әйтеүенсә, артыҡ ауырлыҡ һаулыҡҡа ла зыян килтерә башлай: даими арығанлыҡ һәм хәлһеҙлек, йәшәү сифатының түбәнәйеүе күҙәтелә. Шул саҡта хирургик операция тураһында ҡарар ҡабул итә лә инде ул.

Операция уға физик яҡтан еңелерәк бирелә. Ысын ҡатмарлыҡтар унан һуңғы реабилитация осоронда һәм туҡланыу ғәҙәттәрен алмаштырғанда барлыҡҡа килә. Әлиәгә бәләкәй өлөштәргә бүлеп ашарға һәм файҙалы аҙыҡ-түлек һайлауҙы ҡәтғи күҙәтергә кәрәк була.

Был осраҡ ябығыуҙың радикаль ысулдарын эҙләүселәргә файҙалы була ала. Уның тәжрибәһе күрһәтеүенсә, операция - ауырлыҡһыҙ ғына проблеманан ҡотолоу юлы түгел, ә үҙгәрештәрҙең башы. Иң мөһиме - мейеләге үҙгәрештәр һәм үҙ өҫтөңдә көндәлек эшләү.

Фото: https://vk.com/aliya_lava