Оноторға хаҡыбыҙ юҡ

Луганск Халыҡ Республикаһында Башҡортостан Башлығы Радий Хәбиров Бөйөк Ватан һуғышы ваҡытында Донбасты азат иткәндә һәләк булған яугирҙәрҙең мемориаль комплексында һәм туғандандар ҡәберлегендә булды. Улар араһында Рәсәй Геройы, генерал-майор Миңлеғәле Шайморатов етәкселегендәге 112-се Башҡорт кавалерия дивизияһы яугирҙәре лә бар.

Бында ерләнгән 20-нән ашыу яугирҙең исеме әле булһа билдәһеҙ. Өсәүһенең генә исемен асыҡларға мөмкин була. Уларҙың береһе - Балтас районының Ҡомъяҙы ауылында тыуған Кәрим Зиятдинов, 1943 йылда разведка операцияһы ваҡытында һәләк була.

Төбәк етәксеһе Ватанды һаҡлаусыларҙың ҡаһарманлығын иҫкә алып:

- Беҙ Луганск Халыҡ Республикаһы халҡына башҡорт кавалерийҙарына, легендар комдивыбыҙ Миңлеғәле Шайморатовҡа ҡарата һаҡлаған хәтер өсөн тәрән ихтирам менән ҡарайбыҙ. Беҙ быны бик ҡәҙерләйбеҙ, - тине.

***

ЛНР-ҙа республика Башлығы шулай уҡ Красный Луч ҡалаһы эргәһендәге Миус йылғаһындағы Хәрби Дан Музей комплексында булды. Мемориаль ансамбль 1965-1968 йылдарҙа ойошторола. Ул Бөйөк Ватан һуғышы ваҡиғаларына арналған - 1941-1942 йылдарҙа бында башлыса шахтерҙарҙан төҙөлгән уҡсылар дивизиялары ҡатнашлығында ҡаты алыштар бара. 2025 йылда музейҙа Бөйөк Еңеүҙең 80 йыллығы һәм учреждениеның 60 йыллығы хөрмәтенә саралар үткәрелә.

Республика Башлығы экспонаттар менән танышты һәм хөрмәтле ҡунаҡтар китабына теләктәр яҙҙы.

- Был музей бөйөк ата-бабаларыбыҙҙың иҫтәлеге. Бөгөн был хәтерҙе һаҡлау айырыуса мөһим, ул ҙур әһәмиәткә эйә, шул иҫәптән махсус хәрби операцияла ҡулдарына ҡорал тотоп, яҡшылыҡ һәм яуызлыҡ тураһындағы күҙаллауҙарыбыҙҙы яҡлаусылар, бойондороҡһоҙлоғобоҙҙо һәм азатлығыбыҙҙы яҡлаусылар өсөн, – тине Радий Хәбиров.

***

Журналистар менән әңгәмәлә Башҡортостан Башлығы Донбасҡа эш сәфәренә йомғаҡ яһаны.

- Донецк Халыҡ Республикаһы Башлығы Денис Владимирович Пушилин менән берлектә бер нисә объектта булдыҡ һәм артабанғы хеҙмәттәшлек мөмкинлектәрен тикшерҙек. Беҙҙең төбәктәрҙе туғанлыҡ мөнәсәбәттәренең оҙайлы тарихы бәйләй, – тип һыҙыҡ өҫтөнә алды Радий Хәбиров. - Донбасс халҡына героик үткәнебеҙ тураһында хәтерҙе һаҡлағандары һәм бөгөн ҡулдарына ҡорал тотоп, Ватанды һаҡлағандарға ярҙам иткәндәре өсөн ҙур рәхмәт.

Башҡортостан Башлығы махсус хәрби операция бурыстарын үтәгән төбәктең хәрби подразделениеларының яйға һалынған эшен дә билдәләне.

- Республика балаларға күпме кәрәк булһа, шул тиклем ярҙам итте, ярҙам итә һәм ярҙам итәсәк. Был сәфәр хәрби хеҙмәткәрҙәргә ярҙам күрһәтеүҙең һөҙөмтәлелеген баһалау өсөн кәрәк ине, – тип билдәләне Радий Хәбиров. – Бөгөн Ватанды һаҡлаған барлыҡ егеттәр менән ғорурланабыҙ, әммә айырым ғорурлыҡ - беҙҙең «Башҡортостан» полкы. Был яйға һалынған хәрби берәмек, уның тураһында командование бик юғары баһа бирә. Шуға күрә полк подразделениеларына барып, беҙҙең яугирҙәргә ярҙам итеү тураһында һөйләшеп килештек.

Төбәк Башлығы шулай уҡ 2025 йылдың майында Жуков орденлы 12-се Айырым гвардия Кенигсберг-Городок Ҡыҙыл Байраҡ орденлы инженер бригадаһы урынлашҡан урынға барған саҡта шәхси составҡа махсус хәрби операция зонаһында хәрби бурыстар үтәгән хеҙмәттәштәрен күрергә вәғәҙә итеүе тураһында һөйләне.

- Был республикала берҙән-бер хәрби часть, шуға күрә уларҙың нисек хеҙмәт итеүен күреү бик мөһим ине. Хәрби операцияларға әҙерлек барышын ҡараныҡ, - тине Радий Хәбиров. - Подразделениеларға ярҙам саралары тураһында һөйләшеп килештек. Дөйөм алғанда, был эш тейешле кимәлдә ойошторолған. Беҙ ебәргән ярҙамдың һәр төрө – ҡотҡарылған ғүмерҙәр, һаулыҡ һәм хәрби бурыстарҙы үтәүҙең һөҙөмтәлелеге. Башҡортостандың ҡала һәм район башлыҡтарына, битараф булмаған халыҡҡа яугирҙәребеҙгә һәм уларҙың ғаиләләренә ярҙам иткәндәре өсөн рәхмәт белдерәм.