Әлегә матчтар үткәрелмәй

12 ғинуарҙа булырға тейеш “Салауат Юлаев” – “Авангард” матчы үткәрелмәне.

Сәбәбе – Өфө клубындағы 20 хоккейсының, биш тренерҙың һәм команданың бер вәкиленең коронавирус инфекцияһына бирелгән тес­тарының ыңғай һөҙөмтә күрһәтеүе. “Матчтарҙы һуңғараҡ уҙғарыу мөмкинлеге тураһындағы ҡарарҙы лига өҫтәмә рәүештә ҡабул итәсәк. 2022 йылдың 11 ғинуарында Континенталь хоккей лигаһы клубтары менән эпидемиологик хәл,  регуляр чемпионатты тамамлау, плей-оффты үткәреү йәһәтенән кәңәшмә ойоштороласаҡ”, – тиелә Континенталь хоккей лигаһының рәсми хәбәрендә.

Быға тиклем “Салауат Юлаев” хоккей клубының Ригала, Хельсин­киҙа булырға тейешле матчтары үткәрелмәне.

Әйткәндәй, күптән түгел юлаевсы Шакир Мөхәмәҙуллиндың тыуған көнө булды. Уға 20 йәш тулды. Шакирҙы ғүмер байрамы менән ҡотлайбыҙ, сәләмәтлек, уңыштар теләйбеҙ.

Шакир Мөхәмәҙуллин – “Салауат Юлаев” һаҡсыһы. Ошо хоккей ко­мандаһы мәктәбендә тәрбиәләнгән. Шакир 2018/19 йылда профессиональ кимәлдә “Толпар” йәштәр командаһы составында уйнай башланы. 2019/20 уйын миҙгелендә “Салауат Юлаев”тың төп составында сығыш яһау бәхетенә өлгәште.

2020 йылдың 5 сентябрендә Череповецтың “Северсталь” коман­даһына ҡаршы уйнағанда 18 йәшлек яҡташыбыҙ лигала беренсе шай­баһын индерҙе. Һөҙөмтәлә Шакир “Салауат Юлаев”тың Континенталь хоккей лигаһында шайба кереткән иң йәш уйынсы булып танылды. Өҫтәүенә, Шакир Мөхәмәҙуллин – лигалағы 2002 йылғылар араһында рәсми матчта гол менән айырыла алған беренсе хоккейсы.

Айһылыу НИЗАМОВА