Ҡышын иң яҡшы ял - бында!

Яңы йыл байрамдарында Башҡортостанда ҡышҡы спорт төрҙәрен яратыусылар өсөн төрлө трассалар тәҡдим иткән 14 тау саңғыһы үҙәге эшләйәсәк. Канат юлдары һәм тау саңғыһы үҙәктәренең күтәргестәре техник хеҙмәтләндереү үткән һәм файҙаланыуға әҙер.

- Төбәктең тау саңғыһы курорттары ғаилә ялы өсөн бик уңайлы. Бында саңғыла, сноубордта йәки тюбингта шыуыуҙан ғына түгел, ә яҡындарың менән онотолмаҫлыҡ ваҡыт үткәреүҙән дә ләззәт алырға мөмкин. Профессиональ инструкторҙар яңы башлаусыларға ла, ҡышҡы спорт төрҙәре менән мауығыусыларға ла ярҙам итәсәк, – тип аңлатма бирҙе Башҡортостан Республикаһының эшҡыуарлыҡ һәм туризм министры Зөһрә Гордиенко.

Тау саңғыһы үҙәктәрендә төрлө ҡатмарлылыҡтағы һәм оҙонлоҡтағы 60 трасса эшләйәсәк. Улар араһында “Яҡтыкүл” үҙәге бар, унда төрлө ҡатмарлылыҡтағы алты трасса һәм бер тюбинг трассаһы урынлашҡан. Иң ҙур бейеклек 450 метрға етә, ә күтәргестәрҙән иҫ киткес матур тәбиғәт күренештәре асыла.

Республиканың бөтә тау саңғыһы үҙәктәре, масштабына ҡарап, гондоль тибындағы тиҙлекле күтәргестәр, бугель йәки кресло күтәргестәр менән йыһазландырылған. Республиканың тау саңғыһы үҙәктәре эшмәкәрлегендә төбәк, төбәк-ара, Бөтә Рәсәй һәм халыҡ-ара кимәлдәге ярыштарҙы һәм турнирҙарҙы ойоштороу һәм үткәреү мөһим йүнәлеш булып тора.

Тау саңғыһы курорттарында эш сәғәттәре һәм тарифтары төрлө, был профессионалдар өсөн дә, яңы саңғысылар өсөн дә яраҡлы вариант табырға мөмкинлек бирә.

Өҫтәмә түләп квалификациялы инструкторҙарҙың хеҙмәттәренән файҙаланырға мөмкин. «Абҙаҡ» һәм «Яҡтыкүл»дә «Берҙәм» ски-пасс системаһы һәм «Юбилейный» шифаханаһында һәм «Абҙаҡ» ял йортонда йәшәгәндә ски-пасҡа 50 процент ташлама ҡаралған.

Фото һәм мәғлүмәт: https://pravitelstvorb.ru/news/25845/