Атаһы менән ҡыҙҙары реанимацияға эләккән ғаиләгә аҡса йыя башланылар

Иглинда йөк машинаһы тәгәрмәсе аҫтына эләккән алты йәшлек ҡыҙҙың атаһы Илвир Заманов Салауат районының Таймый ауылынан икән. Ул кесе биш йәшлек ҡыҙы менән ауылына ата-әсәһенә хужалыҡ һәм ремонт эштәрендә ярҙамлашырға ҡайтҡан булған.

Ғаиләһе менән йәшәгән Иглинда өлкән ҡыҙы юл-транспорт ваҡиғаһында бәлә күргәнен белгәс, йәһәтләп ҡайтырға сыға. Әммә Әшә ҡалаһы янында ҡабаланып үҙе лә аварияға осрай. Һөҙөмтәлә өсәүһе лә реанимацияға эләгәләр.

Шуныһы: ҡатыны Венера өсөнсөгә ауырлы. Ә таймыйҙар ғаиләгә ярҙам итеү маҡсатында аҡса йыя башлаған. Сөнки Замановтарҙың йорто ла, машинаһы ла кредитҡа алынған. Ярҙам итергә теләгәндәр өсөн Илвирҙың әсәһе Маһира Рауил ҡыҙының телефоны бирелгән: 8 987 046 47 55.

Аллаға шөкөр, барыһы ла тере, тик ҡыҙҙарға корсет кәрәк, сөнки уларҙың умыртҡа һөйәге ныҡ зыян күргән, ти таныштары. Барыһы ла яҡшы тамамланһын инде!

Фото: "На земле Салавата" гәзите төркөмөнән.