Сленгмы әллә дөйөм мәҙәниәтме?

Жаргонизмдарҙың һәм башҡа телдән үҙләштерелгән һүҙҙәрҙең киң һәм йылдам таралыуы дәүерендә эксперттар кешеләргә үҙ-ара аңлашыуҙы юғалтыу хәүефенең янауы хаҡында йышыраҡ иҫкәртә.

“Берләштергән тел: сленг беҙгә берҙәм булырға нисек ҡамасаулай”  тигән яңы видеояҙма тамашасыларға “Әлеге һөйләшеү рәүеше йәмғиәттең берҙәмлеге өсөн ҡаршылыҡ тыуҙырмаймы?” тигән һорау хаҡында уйланырға тәҡдим итә.

Видео авторҙары, рус теле – аралашыу өсөн һүҙҙәр йыйылмаһы ғына түгел, ә милли мәҙәниәттең, үҙенсәлектең нигеҙе, көслө берләштереүсе фактор, тип билдәләй. Әммә сленгтың күпләп ҡулланылыуы, һүҙҙәрҙе сит телдән нигеҙһеҙ үҙләштереүҙәр һәм телмәр штамптары көнкүрештә лә, мәҙәниәттәрҙең аралашыуы кимәлендә лә үҙ-ара аңлашыуға ҡамасаулай, тигән фекерҙә улар.

Видеояҙмала хатаһыҙ, йөкмәткеле, саф телмәрҙең үҙеңә һәм эргәңдәгеләргә ҡарата ихтирам сараһы булыуына баҫым яһала. Тап ул ныҡлы милләт-ара бәйләнеш булдырырға, белемде тапшырырға, йолаларҙы һәм сәнғәтте һаҡлап ҡалырға ярҙам итә. Кешеләр аңлайышлы, матур рус телендә һөйләшкәндә бер-береһенә яҡыныраҡ, көслөрәк була.

“Әйҙәгеҙ, рус теле беҙгә аңлашылмаусанлыҡ сығанағы түгел, ә барыбыҙҙы ла берләштергән ҡеүәтле сара булып хеҙмәт итһен”, – ти видео авторҙары. Яҙма туған телдең киләсәгенә битараф булмағандар өсөн тәғәйенләнә.  

Фото: ok.ru/mgazetarb/topic/158729437355350