Баймаҡ районы башҡорттары ҡоролтайы – республикала уңышлы, һөҙөмтәле эшләгән йәмәғәт ойошмаларының береһе. Быйыл районда Ҡоролтай хәрәкәте ойошторолоуға 25 йыл тулды. Тыуған яҡты өйрәнеүсе, абруйлы уҙамандарҙың береһе Әмир Сәйғәфәров район башҡорттары ҡоролтайының беренсе етәксеһе итеп һайлана һәм ул 18 йыл дауамында ойошмаға етәкселек итә. Артабан уның эшен матбуғат ветераны Ғәлимйән Баймырҙин лайыҡлы дауам итә. 2016 йылдан Ришат Ишембәтов Баймаҡ районы башҡорттары ҡоролтайының башҡарма комитеты рәйесе булып эшләй. Бөгөн беҙ Ришат Вәкил улы менән урындағы ҡоролтайҙың эшмәкәрлеге, уңыштары, халыҡ араһында алып барылған төрлө проект, акциялар, ауыл ерендә ойошторолған саралар хаҡында әңгәмәләштек.
– Ришат Вәкил улы, былтыр район башҡорттары ҡоролтайы республикала тәүгеләрҙән булып Рәсәй Президенты Грантына лайыҡ булды. Һөйләшеүҙе ошо еңеүҙән башлайыҡ әле.
– Ысынлап та, 2020 йылда Баймаҡ районы башҡорттары ҡоролтайы граждандар йәмғиәтен үҫтереү буйынса Рәсәй Президенты грантын отто. “Экологик һабантуй” тип аталған проекттың дөйөм күләме – 500 мең һум. Проектҡа ярашлы, райондың 10 ауыл биләмәһендә Һаҡмар йылғаһы буйында 200-әр төп ҡайын һәм ҡарағай үҫентеләрен ултырттыҡ, уларҙы кәртәләп алдыҡ. “Ҡоролтай” аллеялары барлыҡҡа килде. Ауыл биләмәләре был акцияға бик әүҙем ҡушылды һәм изге эшкә бар йәмәғәтселекте йәлеп итте. Мәҫәлән, Таулыҡай һәм Темәс ауыл биләмәләрендә бер нисә аллея барлыҡҡа килде, Күсей ауыл халҡы иһә үҙ көсө менән “Ҡоролтай” аллеяһын булдырҙы.
“Экологик һабантуй” проекты нигеҙендә Һаҡмар йылғаһы буйында ултыртылған 2000 төптән ашыу ағас кәртәләп алынды, матур итеп буялды, тирә-яғы төҙөкләндерелде. Был эштәрҙең барыһын да һәр ауыл халҡы өмәләр ярҙамында үҙ көсө менән атҡарып сыҡты. Грант аҡсаһы биш соҡор ҡаҙғыс, төҙөлөш материалы һатып алыуға һәм баннерҙар эшләтеүгә тотонолдо. Шулай уҡ был проектты тормошҡа ашырыуҙа ижади ҡараш һәм ҙур әүҙемлек күрһәткәндәре өсөн Ярат ауыл биләмәһе (башлығы – Фәнүр Йәрмөхәмәтов) – беренсе урынға, Билал (Илдар Саптаров) менән Темәс (Айгөл Байрамғолова) – икенсе урынға, Таулыҡай (Фуат Сәйетов) һәм Ниғәмәт (Булат Тайбугин) ауыл биләмәләре өсөнсө урынға лайыҡ булды.
Ҡолсора, Йомаш, Әбделкәрим һәм Беренсе Этҡол ауыл биләмәләре халҡы тырышлыҡ һәм әүҙемлек күрһәткәне өсөн Ҡоролтайҙың махсус дипломы менән бүләкләнде. Әйткәндәй, быйыл да “Мул һыулы Һаҡмар” һәм “Ҡоролтай” аллеялары проекттарын тормошҡа ашырыу дауам итә, яҙлы-көҙлө ауылдарҙа ағас ултыртыу әүҙем бара.
– Тағы ла ниндәй проекттар буйынса маҡсатлы эш алып барыла?
– Иң ҙур проекттарыбыҙҙың береһе – “Сәләмәт ауыл” акцияһы. Уны бишенсе йыл рәттән ойошторабыҙ. Күптәр был проектты республика буйынса барған “Айыҡ ауыл” конкурсы менән бутай, әммә шуны әйтергә кәрәк, тап ошо “Сәләмәт ауыл” акцияһында ҡатнашыусылар, бер аҙ көс туплап, берләшеп, сәмләнеп республика кимәлендәге “Айыҡ ауыл” конкурсында ҡатнашырға теләк белдерә лә инде. Мәҫәлән, Йылым ауылы “Айыҡ ауыл-2019”-ҙа икенсе урынға лайыҡ булһа, быйыл “Айыҡ ауыл-2020” сараһында Түбәнге Яйыҡбай ауылы халҡы беренсе урынға сыҡты һәм 5 миллион һумлыҡ сертификат менән бүләкләнде. Әле грант аҡсаһына ауылды төҙөкләндереү эше башланды.
Шуныһы ҡыуаныслы: “Сәләмәт ауыл” проектына ярашлы, күп ауылдарыбыҙ сәләмәт тормошҡа йөҙ бора, рухи йәһәттән күтәрелеш кисерә. Эскелеккә ҡаршы көрәш киң йәйелдерелә, халыҡ үҙе лә спортҡа, сәләмәт йәшәүгә ынтыла, төрлө спорт ярыштары ойошторола, халыҡ унда әүҙем ҡатнаша. Бигерәк тә йәш ғаиләләрҙең балалары менән бергә спортты үҙ итеүе ҡыуандыра, сәләмәт ғаиләлә һау-имен балалар тәрбиәләнә. Ололар менән йәштәр араһында быуындар бәйләнеше барлыҡҡа килә. Ҡыҙҙар, әсәй-өләсәйҙәренән күреп, төрлө матур ғәҙәттәргә, ҡул эштәренә өйрәнә. Малайҙар атай-олатайҙарына ҡарап ир тәрбиәһе ала. Был эштәрҙең барыһында ла ауылдарҙа ойошторолған ҡоролтай, ир-егет ҡорҙарының да өлөшө баһалап бөткөһөҙ.
Әйткәндәй, район башҡорттары ҡоролтайының башҡарма комитеты биш проект буйынса маҡсатлы эш алып бара. Шуларҙың береһе – “Туған телде һаҡлау һәм үҫтереү”. Тәү ҡарашҡа, беҙҙең районда туған телде өйрәнеүгә бәйле проблемалар юҡ та кеүек, башҡорттар йәшәгән төбәктә барыһы ла яҡшы кеүек күренәлер ҙә. Әммә был юҫыҡта ла байтаҡ мәсьәләләр бар, уларҙы хәл итеүҙе бөгөндән үк ғаиләлә башлау зарур. Иң етди проблема – бөгөн кескәй балаларҙың теле әсә телендә түгел, ә төрлө гаджеттарҙы ҡарап өйрәнгәнгә күрә, рус телендә асыла. Хатта ауылдарҙа балалар баҡсаһына йөрөгән балалар үҙ-ара русса һөйләшеп маташа. Ата-әсәһе, тәрбиәселәр уға башҡортса өйрәтмәй, шул балаға телен вата-емерә русса һүҙ ҡушып маташа. Көлөрһөң дә, иларһың да... Ә аҙаҡтан “балалар башҡортса белмәй” тип зарланабыҙ. Бында бөтә нәмә ата-әсәнән килә, ғаиләлә һалынған матур ғәҙәттәр артабан балалар баҡсаһында, аҙаҡ мәктәптә дауам итә.
“Туған телде һаҡлау һәм үҫтереү” проектына ярашлы, башҡарма комитет һәм абруйлы башҡорт теле уҡытыусыларынан төҙөлгән комиссия, ҡаланың бөтә белем учреждениеларында булып, был юҫыҡтағы эштәр менән яҡындан танышты, йәғни йәмәғәт мониторингы үткәрҙе. Һығымталар район хакимиәтенең мәғариф бүлегенә, район хакимиәтенә еткерелә. Шулай уҡ мәктәптәрҙә башҡорт ҡоролтайҙары ойоштороу тәҡдимен дә индерҙек, әммә ул белем усаҡтарында әллә ни хуплау тапманы. Был тәңгәлдә Ишмырҙа мәктәбен (директоры Иҙел Монасипов) генә өлгө итеп күрһәтергә була.
– Ришат Вәкил улы, һеҙ етәкселек иткән ойошманың яҡшы эшләүе хаҡында хәбәрҙарбыҙ, әммә бар эште лә яңғыҙ атҡарып сығыу мөмкин түгел. Ауылдарҙағы ҡоролтайҙар, уларҙың етәкселәре лә һеҙгә бар яҡлап ярҙам күрһәтәлер бит? Ғәмәлдә ниндәй ауылда ҡоролтайҙың эше яҡшы яҡтан баһалана?
– Үҙегеҙ белеп тораһығыҙ, йәмәғәт ойошмаларының барыһы ла йәмәғәт башланғысында эшләй, уларға хеҙмәт хаҡы түләнмәй, аҡса бүленмәй, шуға күрә ауылдарҙа күп эш башлыса халыҡ ярҙамында, уның теләге һәм инициативаһы менән атҡарыла. Әммә уларҙы ла ойоштороп ебәреүселәр, әйҙәүселәр кәрәк. Урындағы ҡоролтай етәкселәре халыҡ менән бергә эш алып барған ауылдарҙа ағинәйҙәр, ҡатын-ҡыҙҙар, ир-егеттәр ҡоро бергәләшеп, иңгә-иң ҡуйып хеҙмәттәшлек итә. Мәҫәлән, Ишбирҙенән ҡоролтай рәйесе Сәлим Иҫәндәүләтов, Таулыҡайҙан Йәүҙәт Мөхәмәтйәров, Ниғәмәттән Юлай Кәримов, Күсейҙән Ҡунаҡбай Уйылдановтарҙы маҡтап телгә алыр инем. Әйткәндәй, йыл һайын “Йыл ҡоролтай рәйесе”, “Йыл ир-егеттәр ҡоро рәйесе” номинацияларын булдырып, районда үткән йыл йомғаҡтарын барлау тантанаһында тапшырып барабыҙ. Был да ниндәйҙер кимәлдә йәмәғәт ойошмаларының мәртәбәһен арттыра.
Әлбиттә, проекттарҙың барыһына ла туҡталып, уларҙың эше хаҡында сәғәттәр буйы һөйләргә мөмкин. Мин гәзит уҡыусыларҙы уларҙың бер нисәһе менән генә таныштырыр инем.
– Әле районда “Сәләмәт ауыл”дың сираттағы конкурсы дәррәү бара, быйыл иғлан ителгән “Сылтыр шишмә” акцияһына ҡушылыусылар ҙа бихисап. Һуңғыһы хаҡында бер аҙ мәғлүмәт бирһәгеҙ ине.
– Быйыл Баймаҡ районы башҡорттары ҡоролтайы башҡарма комитеты, республика Башлығы Радий Хәбировтың “Атайсал” проектына һәм “Сәләмәт ауыл” район конкурсына ярашлы, “Сылтыр шишмә” акцияһы иғлан итте. Өфө ҡалаһының Ленин районы башҡорттары ҡоролтайы рәйесе, Әҙеһәм Исҡужин исемендәге 9-сы музыка мәктәбе директоры, Буранбай ауылында тыуып үҫкән яҡташыбыҙ Әхиәт Ғәйетбаев был акцияны тәүгеләрҙән башлап ебәрҙе. Ул, ауылындағы Һыулүәк шишмәһенең башын таҙалап, кәртәләп алып, башҡаларға яҡшы өлгө күрһәтте. Был эшкә ауыл халҡы ла ихлас ҡушылды, улар шишмәне төҙөкләндереүҙә ҙур ярҙам күрһәтте. Шулай уҡ Өфөлә йәшәгән йәнә бер яҡташыбыҙ – танылған ғалимә Миңһылыу Усманова, тыуған еренең Йылы ҡойо тип аталған шишмәһен һаҡлап ҡалыу өсөн етәрлек аҡса бүлеп, Ишмөхәмәт ауылы халҡы ярҙамында был изге эште атҡарып сыҡтылар. Әйткәндәй, Миңһылыу Ғөбәйт ҡыҙы бала сағы һәм үҫмер йылдары үткән Үрге Иҙрис ауылындағы Ҡарттар ҡоҙоғон кәртәләп алыуға ла үҙ өлөшөн индергәйне. Яҡташыбыҙҙың изге эше маҡтауға лайыҡ, әлбиттә.
Һуңғы йылдарҙағы ҡоролоҡ һөҙөмтәһендә күп ауылдарҙа шишмә, ҡоҙоҡ, хатта йылға-инеш баштары ҡороуға дусар булды, шуға күрә уларҙы таҙартып, кәртәләп алыу – бик кәрәк һәм әһәмиәтле ғәмәл. Шуныһы иғтибарға лайыҡ: кәртәләп алынған ҡоҙоҡ, инеш-шишмә башы таҙартылып, кәртәләп алынғас та, күптәренә һыу ҡайтып, сылтыр ғына аға башлауы күҙәтелә. Тимәк, беҙ башҡарған эштәр юҡҡа түгел, тәбиғәткә саҡ ҡына иғтибар булғанда, ул үҙе үк кешегә ярҙамға килергә әҙер. Һуңғы көндәрҙә Күсей ауыл биләмәһендә ҡоҙоҡтарҙы кәртәләп алыу буйынса бик матур эштәр башҡарылды. Семеновка ауыл биләмәһе башлығы Рәсүл Сәлимов етәкселегендә бөтәһе 12 шишмә кәртәләнде. Уларҙың һәр береһенә шәхсән рәүештә йөрөп сыҡтыҡ. Бына бит тәбиғәтте һаҡлау, шишмәләрҙе тергеҙеү буйынса ниндәй әһәмиәтле эштәр атҡарыла.
– Эшегеҙҙә уңыштар насип булһын. Халыҡ, тел, ил яҙмышы өсөн борсолоп, аныҡ эштәр башҡарған, изге ғәмәлдәре менән күптәргә өлгө булған Баймаҡ районы башҡорттары ҡоролтайы артабан да һөҙөмтәле эшләһен, урындарҙағы ҡоролтайҙар үҙ эшен артабан да йәнләндереүен дауам итһен.
Кәримә УСМАНОВА әңгәмәләште.
Баймаҡ районы.