7 миллиондан ашыу кеше "Госуслуги.Дом" ҡушымтаһынан файҙалана

Президент инициативаһы буйынса коммуналь хеҙмәттәр күрһәтеү сифатын яҡшыртыу өсөн торлаҡ-коммуналь хужалыҡ өлкәһен һанлы үҙгәртеп ҡороу буйынса комплекслы эш алып барыла. Был башланғыс сиктәрендә Төҙөлөш министрлығы Һанлы үҫеш министрлығы менән берлектә “Дәүләт хеҙмәттәре. Йорт" мобиль ҡушымтаһын индерә.  Ул торлаҡ-коммуналь хужалығы дәүләт мәғлүмәт системаһы (ГИС) нигеҙендә эшләй һәм торлаҡ-коммуналь өлкәләге мәсьәләләрҙе хәл итеүҙе ябайлаштыра, бөтә хеҙмәттәрҙе бер урынға туплай. Был хаҡта Хөкүмәт Рәйесе урынбаҫары Марат Хөснуллин хәбәр итә.

- Беҙ төҙөлөштә һанлы ҡарарҙарҙы әүҙем индерергә тырышабыҙ һәм параллель рәүештә уларҙы торлаҡ-коммуналь хужалыҡ өлкәһендә лә үҫтерәбеҙ. Тармаҡта ҡатнашыусыларҙың барыһы ла тиерлек торлаҡ-коммуналь хужалыҡтың ГИС системаһында мәғлүмәттәрҙе тултырыуҙы күҙәтә ала, был граждандарға “Дәүләт хеҙмәте. Йорт"то ҡулланғанда дөрөҫ мәғлүмәт алырға ярҙам итә. 7 миллиондан ашыу ҡулланыусы был ҡушымтаны урынлаштырған да инде.  Торлаҡ-коммуналь хеҙмәт дәүләт системаһының һанлы сервистарын граждандар ғына түгел, власть органдары ла уңышлы ҡуллана. Был өлкәлә һанлаштырыу ысынлап та мөһим,  айырыуса алдағы бер нисә йылға торлаҡ-коммуналь хужалыҡ өлкәһен яңыртыу буйынса пландарҙы иҫәпкә алғанда, - тине Марат Хөснуллин.

Вице-премьер аңлатыуынса, ҡушымта фатир хужалары өсөн тәғәйенләнгән. Ул счетчиктарҙың күрһәтмәләрен тапшырырға, коммуналь хеҙмәттәр өсөн түләргә һәм ғаризалар ебәрергә мөмкинлек бирә. Ҡулланыусылар милекселәр йыйылыштарында тауыш биреүҙә ҡатнаша, капиталь ремонт пландары менән таныша һәм идара итеүсе компанияның отчеттарын күҙәтә ала. Шулай уҡ счетчиктарҙы тикшертеүгә заказ биреү һәм фатир страховкаһын рәсмиләштереү мөмкинлеге бар.

Заманса хеҙмәттәр күп фатирлы йорттарҙа йәшәүселәр өсөн генә булдырылмай, ул шәхси торлаҡ йорт хужалары өсөн дә уңайлы буласаҡ. Шулай уҡ милексе булмаған режимды булдырыу мөмкинлеге тикшерелә. Торлаҡты ҡуртымға алыусыларға, туғандары өсөн түләргә кәрәк булғанда, ҡушымта функционалына инеү мөмкинлеге була. Был турала Рәсәй төҙөлөш һәм торлаҡ-коммуналь хужалыҡ министры урынбаҫары Константин Михайлик һөйләне.

Башҡортостан Республикаһы территорияһында ҡушымтаны ҡулланыусылар һаны 210 меңдән ашыу кеше тәшкил итә. Бер йылда фатир хужалары идара итеүсе ойошмаларға 140 меңдән ашыу шәхси һәм 2 550 коллектив ғариза биргән, 190 меңдән ашыу тапҡыр иҫәп приборҙары күрһәткестәре тапшырылған һәм 285 меңдән ашыу торлаҡ-коммуналь хеҙмәттәр өсөн түләү башҡарылған.

“Госуслиги. Дом”ды бөтә популяр ҡушымталар магазиндарында: RuStore, AppStore, Google Play һәм AppGallery, йәки ошо һылтанма буйынса: https://www.gosuslugi.ru/mp_dom. күсереп алырға була. Авторизация дәүләт хеҙмәттәре порталында раҫланған иҫәп яҙмаһы аша башҡарыла. Күсемһеҙ милек, иҫәп-хисап приборҙары һәм иҫәп-хисап тураһында мәғлүмәттәр автоматик рәүештә барлыҡҡа киләсәк. Мәғлүмәт булмағанда, ғариза бирергә мөмкин һәм идара итеүсе ойошма мәғлүмәттәрҙе актуалләштерә.