Илдар Жамалов: "Хуш, дуҫым!"

Йырсы Илдар Жамалов коллегаһы, дуҫы Илнур Ҡәләмовтың вафаты тураһында хәбәр иткән:

"Бөгөн беҙҙең өсөн ауыр ҡайғылы көн. Яҡын дуҫыбыҙ, "Bakshai star" продюсер үҙәгенең саунд-продюсеры, алмаштырғыһыҙ ижади фекерҙәшебеҙ, бер туғандай булған коллегабыҙ Илнур Ҡәләмов һәләк булды. Был юғалтыуҙы һүҙҙәр менән генә аңлатып булмай — йөрәгебеҙҙең бер өлөшө өҙөлөп төшкәндәй.

Илнур иҫ киткес талантлы йырсы, ҡурайсы һәм аранжировщик ине. Уның яҙған йырҙары һәр ваҡыт халыҡ күңеленә үтә торған хиттарға әйләнде. Беҙ уның менән күпме гастроль юлдарын тапаныҡ, күпме сәхнәләрҙе бергә шаулаттыҡ. Минең бер концертым да унһыҙ үтмәне — ул тауышты ла көйләне, үҙе лә йырланы, моң донъяһының терәге булды. Бөгөн мин йырлаған бик күп йырҙарҙың авторы ла, йәне лә ул ине.

Илнур үҙенең ғүмерен Ватанды һаҡлауға арнаны һәм батырҙарса һәләк булды. Уның таланты, игелеклелеге һәм яҡты иҫтәлеге беҙҙең күңелдәрҙә, ул ижад иткән моңдарҙа мәңге йәшәйәсәк.

Илнурҙың ата-әсәһенең, туғандарының һәм яҡындарының ауыр ҡайғыһын уртаҡлашам. Сабырлыҡ һәм түҙемлек бирһен Хоҙай һеҙгә. Урыны ожмахта, йәне йәннәттә булһын.

Хуш, дуҫым. Тыныс йоҡла. Исемең йырҙарыңда мәңге йәшәр".

Илнур Ҡәләмовтың бөтә туғандарының, яҡындарының, дуҫтарының ауыр ҡайғыһын уртаҡлашабыҙ.

Фото: И. Жамаловтың шәхси архивынан.

Беҙҙең МАХ каналына https://max.ru/gazetabashkortostan ҡушылығыҙ!