Юбилейығыҙ менән, Мөнир Сәхиулла улы!

"Бөгөн, 17 мартта, яҙыусы, шағир һәм драматург, Рәсәй һәм Башҡортостан Журналистар союздары һәм Яҙыусылар союздары ағзаһы, республиканың атҡаҙанған мәҙәниәт хеҙмәткәре һәм халыҡ яҙыусыһы Мөнир Сәхиулла улы Ҡунафинға 55 йәш тула.

Хөрмәтле коллега, дуҫ һәм ышаныслы иптәш Мөнир Сәхиулла улы!
Башҡортостандың бөтә журналистар берләшмәһе исеменән һәм үҙемдән ҡасандыр һайлаған ижади юлыңда хеҙмәтеңде юғары баһалауҙы кәүҙәләндергән матур дата - ике "бишле" менән ҡотлайым!

Һеҙҙең ижади ҡаҙаныштарығыҙ исемлеге быны раҫлай: төбәк һәм төбәк-ара Гран-приҙар яулаусы, В. М. Шукшин исемендәге «Яҡты йәндәр» Бөтә Рәсәй әҙәбиәт конкурсы лауреаты (Вологда ҡалаһы, 2010), «Илһам шишмәләре» төбәк-ара шиғриәт фестивалендә Гран-при яулаусы (Бәләбәй ҡалаһы, 2005), Башҡортостан Республикаһы Башлығы грантына «Яңы офоҡтар» әҙәби конкурсында Гран-при яулаусы (2015).

Һеҙ – бер үк ваҡытта бер нисә йүнәлештә үҙен танытҡан кеше: популяр республика журналы «Ағиҙел»дең баш мөхәррире, «Шундай мәлем» (Китап, 2001), «Ғүмер тигәндәре...» (Китап, 2005), «Тәңре өрөк ҡапҡанда» (Китап, 2012), «Йөҙөп барған, ти, аттар диңгеҙҙә…» (Китап, 2016) кеүек шиғриәт һәм проза йыйынтыҡтары авторы.

Пьесалар авторы һәм драматург Мөнир Ҡунафин үҙенең күп кенә журналист эштәрен Бөйөк Ватан һәм афған һуғышы ветерандарына, махсус хәрби операцияла ҡатнашыусыларға бағышлай. МХО темаһы буйынса герой яугир Фәнис Хөсәйенов тураһында «Бер ғүмер етмәй икән…» очеркы баҫылды. Уны башҡорт телендә генә һигеҙ миллион тапҡыр уҡығандар. Әммә очерк башҡа кешеләрҙең ауыҙынан ишетелгән мәғлүмәттәр нигеҙендә яҙылғанға, автор бының менән генә сикләнмәй. Барыһын да үҙ күҙҙәре менән күрергә теләп, ул махсус хәрби операция зонаһына юллана. Ике тапҡыр ижади командировкаларҙа була. Донбассҡа сәйәхәттәре уның күңелен тетрәндерә.

Алғы һыҙыҡтағы яугирҙәр менән осрашыуҙар уны уйландыра, яңы ижадҡа илһамландыра. Ошо юлъяҙмалары өсөн ул Башҡортостан Республикаһы Хөкүмәтенең Шәһит Хоҙайбирҙин исемендәге журналистар премияһына лайыҡ булды. Мөнир Сәхиулла улының журналда баҫылған юлъяҙмаларына иғтибар иткән Мәскәүҙең «АСТ» нәшриәте уның «МХО. Мин һуғыштан тере килеш сыҡтым» китабын нәшерләй.

М. Кәрим исемендәге Милли йәштәр театрында уның «Бер ғүмер етмәй икән…» пьесаһы буйынса ҡуйылған спектаклдән тыш, драматург шулай уҡ «Нур» татар театры өсөн дә яңы пьеса яҙа. Композитор Заһир Байыҡ менән ижади берлектә өс йыр ижад ителгән, бөтәһе 10 йырҙан торған цикл көтөлә.

Шул уҡ ваҡытта, иҫ киткес уңыштарға һәм танылыуға өлгәшһә лә, Мөнир Ҡунафин тыйнаҡ, талапсан, алсаҡ кеше булып ҡала. Уның менән аралашыу, серҙәр уртаҡлашыу бик күңелле. Уның менән ҡыйыу рәүештә "разведкаға" барырға мөмкин.

Мөнир Ҡунафин ижади үҫеше иң юғары нөктәһендә генәлер тип уйлайым. Коллегабыҙ һәм ышаныслы дуҫыбыҙға яңы ижади үрҙәр теләйем. Уның талантлы әҫәрҙәре күп һанлы уҡыусылар аудиторияһын тағы ла күп тапҡыр ҡыуандырасаҡ. Юбилейың менән, Мөнир!" - тиелгән ҡотлау сығышында.

Фотолар: М. Ҡунафиндың һәм В. Исхаҡовтың шәхси архивтарынан.