Һауа торошо: йәй бөттө ләме ни?

Башҡортостанда эҫе көндәр тора. Башгидромет синоптиктары мәғлүмәттәре буйынса, бөгөн һауа температураһы +30 градустан юғары булыуы көтөлә. Әммә иртәгә, 12 июлдә, ул түбәнәйә. Көндөҙ термометр +28 градус күрһәтәсәк. Ә 13 июлдә көндөҙ тағы ла ике градусҡа һалҡыныраҡ буласаҡ.

Оҙайлы фараздарға ҡарағанда, артабан термометр бағанаһы көндөҙ +18 градус күрһәтәсәк. Был киләһе аҙнала, 16 июлдә, буласаҡ. Ә тағы бер нисә көндән, 22 июлдә, көндөҙ +13 градусҡа тиклем һыуыта.

Июль аҙағында һәм августа эҫе көндәр булмаясаҡ. Һауа температураһы көндөҙ +23, +24 градус була. Ҡайһы бер көндәрҙә +14 градусҡа тиклем фаразлана.

Кешеләр йәйге ялға күпләп сыҡты. Әлбиттә, бындай һауа торошо тәбиғәттә ял итеүгә аяҡ салырға мөмкин.

Шулай ҙа синоптиктар әйтеүенә ҡарап бошонмайыҡ. Улар былтыр-быйыл аномаль эҫелек була, ҡоролоҡ килә тип ҡурҡытҡайнылар. Ә ике йылда ла ямғырҙар мул яуҙы. 

Автор фотоһы.