Ятлауға ауыр шиғыр буламы?

Бөтә донъя башҡорттары ҡоролтайы Мең ырыуы йәмәғәт ойошмаһы һәм Дәүләкән районы хакимиәте менән берлектә арҙаҡлы башҡорт шағиры, I Бөтә Рәсәй мосолмандары съезы (Мәскәү), 1917 йылғы Башҡорт ҡоролтайҙары делегаты, Башҡорт өлкә бюроһын ойоштороусыларҙың береһе Сафуан Яҡшығоловтың шиғырҙарын ятлау буйынса Мең ырыуына ҡараған ун бер район уҡыусылары араһында шиғыр һәм ғилми эшкә тартым иншалар конкурсы иғлан итте. Дәүләкән ҡалаһында 24 апрелдә сараға йомғаҡ яһаласаҡ. Шуға тиклем һәр районда конкурстың төбәк этаптары бара. Ошо уңайҙан беҙгә Бишбүләк районы уҡыусыларының сығыштарын ҡарарға насип булды.

Бишбүләк районының 1-се мәк­тәбендә уҙған сарала ҡатна­шырға 36 уҡыусы теләк бел­дер­гән. Улар беҙгә Сафуан Яҡшы­ғо­ловтың шиғырҙарын яттан һөй­ләп кенә ҡалманы, ә араларында музыкаль яҡтан биҙәп, ижади ком­позиция яһағандар ҙа булды. Бынан тыш, өс бала ғилми эш тә яҙғайны. Сара бик ҡыҙыҡлы бар­ҙы. Дөрөҫөн әйткәндә, шағирҙың яҙыу стиле ябай түгел, ул боронғо һүҙҙәр ҡулланып, теге быуат башында башҡорттар нисек һөйләшкән, әҫәрҙәрен шул тел ҡағиҙәләрендә ижад иткән. Был — юғары кимәлдәге башҡорт әҙәби теле, тип әйтер инем хатта. Ул һүҙҙәрҙең байтағы беҙҙең һөйләштәргә инеп киткән, әммә бөгөн барыһын да ҡулланабыҙ тип булмай, әммә балалар быға әллә ни аптырап тормаған. Уҡытыусыларҙы ла маҡтап телгә алырға кәрәк! Ана нисек итеп ауылдары менән автобустарға тейәп, балаларҙы ошо сараға йыйғандар, шиғырҙар ятлатҡан­дар. Йәнә шуныһы ҡыуаныслы: баш­ҡорт, татар балалары ла саф башҡортса матур итеп һөйләне шиғырҙарҙы. Әлдә генә уҡытыусы түгелмен, сөнки уҡыусыларҙың береһенә лә “бишле”нән кәм мәрәй ҡуя алманым. Райондың башҡорт теле һәм әҙәбиәте уҡы­тыусылары менән берлектә ойошторолған баһалама ағза­лары шулай ҙа еңеүселәрҙе билдәләп, ярыштың финал этабына сыҡҡандарҙы билдәләне.

Шулай итеп, башланғыс кластар араһында беренсе урынға Радмила Сәфәрғәлиева, икенсе урынға – Байрас Батраев, өсөнсө урынға Нияз Исламов лайыҡ булды. V – VIII кластар араһында еңеү­селәр түбәндәгесә билдә­ләнде: Камилә Ишмөхәмәтова – беренсе, Ильяс Ҡасимов – икенсе, Азалия Әхмәтшина өсөнсө урынға сыҡты. IХ – ХI кластар араһында Гөлсәсәк Йосопова, Илзидә Хәбибуллина, Ғәлинур Хәсәновтар алдынғы булды.

Урыҫ телле мәктәптәр араһын­дағы еңеүселәр айырым билдә­ләнде. Әлиә Сәйетгәрәева – беренсе, Гүзәл Хафизова икенсе урынға лайыҡ булды. Афарин, балалар! Бишбүләк районының Ҡаныҡай, Айыт, Елболаҡтамаҡ, Дим мәктәптәренән килгән уҡыусыларға уңыштар теләйбеҙ.

Гөлсәсәк Йосопова, Фәриҙә Нуриева, Алһыу Ҡасимова Сафуан Яҡшығолов тураһындағы ғилми эшкә тартым иншалары менән һөйөндөрҙө. Фәриҙә Нуриева иһә, видеояҙмалар, төрлө китаптарға һылтанмалар эшләп, райондаштары алдында телмәр тотто. Ә Гөлсәсәк Йосопова, әйтерһең, ғүмер буйы Сафуан Яҡшығолов ижадын ғына өйрәнеп ултырған: ул шағир хаҡында бар белгәнен, ғилми сығанаҡтарға таянып, сарала ҡатнашыусы­ларға һөйләне.

Бына ошондай балалар бул­ғанда, уларҙың сығышын тыңла­ғандан һуң, күңел үҫә, милләте­беҙҙең киләсәгенә өмөт уяна ғына түгел, ышаныс нығына! Гөлсәсәк­тең яҙыу стиле лә бик матур, уҡы­тыусылар ҙа ярҙамға килгән­дер (етәксеһе – Р. Тихонова), әммә ул яҡташы Сафуан Яҡшы­ғоловтың ижадын һыу кеүек эскән. Моғайын, уға киләсәген милли матбуғат менән бәйләргә кәрәктер. Ул яҙыуға ғына түгел, ә фекерҙәрен башҡортса әйтеп бирергә лә бик маһир. Афарин, Гөлсәсәк!

Балаларҙың уңышлы сығыш яһауына ҡарап айырым Маҡтау ҡағыҙҙары ла тапшырылды: Илсур Хөсәйенов – “Ҡыйыулыҡ өсөн”, Рус­лан Ишниязов менән Милана Ишмөхәмәтова – “Тасуири уҡыу өсөн”, Лена Солтанова – “Артист оҫталығы өсөн”, Ленария Ғилманова менән Инсаф Хәсәнов “Өмөт” номинацияларында билдә­ләнде.

Һәр районда бына ошолай ойошторолорға тейеш Башҡорт­остан автономияһы башында торған шәхестәргә арналған саралар. Быйыл милләттең аҫыл кешеләренең исеме, эше, фиҙа­кәрлеге балаларҙың, йәштәрҙең аңына һалынырға тейеш!

Хакимиәт башлығының социаль мәсьәләләр буйынса урын­баҫары вазифаһын ваҡытлыса башҡа­рыусы Артур Зарипов, сараны ойошторған уҡыусыларға рәхмәт белдереп, балаларҙы тәбрикләне.

Райондың әүҙем йәмәғәт эш­мә­кәре, Өфө ҡалаһында йәшәһә лә, Бишбүләк районында үткән сараға бүләктәрен тейәп ҡайтып еткән Альфред Шәймәрҙәнов был юлы ла конкурстан ситтә ҡалма­ны. Район хакимиәте әҙерләгән Маҡтау грамоталары менән бергә уҡыусыларға бүләккә китаптар тапшырылды.

Бишбүләк районы