Тамырын белгән ил ҡоромаҫ

Республикабыҙға һәм уның Дәүләт архив хеҙмәтенә 100 йыл тулыу айҡанлы үткәрелгән сара йәш быуында илһөйәрлек, тарихи-мәҙәни мираҫҡа ҡарата һаҡ­сыл ҡараш булдырыу, уларҙы ғилми-эҙләнеү эштәренә йәлеп итеү маҡсатында ойошторолған.

Сара башланыр алдынан конференцияла ҡатнашыусылар, ҡунаҡтар өсөн музейҙа экскурсия турҙары эшләне, коридор диуар­ҙа­рында билдәле шәхестәрҙең шәжәрәләре урын алды.

Конференцияла республика ғилми-тикшеренеү бәйгеһендә призлы урындар яулаған йәш ғалимдар сығыш яһаны. “Баш­ҡорт­остандың үҫешенә йоғонто яһаған шәхес роле” номина­цияһында III урынды яулаған Айнур Хисаметдиновтың эшен күренекле Кинйә Арыҫлановҡа арнауы осраҡлы түгел. Ул – Мәләүез ҡалаһындағы Кинйә Арыҫланов исемендәге башҡорт гимназия-интернатында физкультура уҡытыусыһы.

– Төп маҡсатым – йәш егет­тәр­ҙе малай саҡтарынан алып Кинйә, Салауат кеүек көслө, ҡыйыу итеп тәрбиәләү, милли көрәшкә иғтибарҙы арттырыу һәм Кинйә Арыҫлановтың исемен мәңгеләштереү, – тине ул, сығы­шын йомғаҡлап.

Ошо уҡ номинацияла икенсе урынға лайыҡ булған Эльвина Латипова Х класта белем ала. Сығышы менән Ҡырмыҫҡалы районынан булған ҡыҙ үҙенең ғилми-тикшеренеү эшен билдәле башҡорт яҙыусыһы Фәрит Иҫән­ғоловтың шәжәрәһенә арнаған.

Башҡорт автономияһы өсөн әүҙем көрәшселәрҙең береһе, тамырҙары Күгәрсен районының Теләүембәт ауылына барып тоташҡан Ғабдулла Иҙелбаевтың шәжәрәһе күргәҙмәләге башҡа­лары араһында ҙурлығы менән иғтибарҙы йәлеп итә. Уның ейән­сәре Рәзилә Иҙелбаева үҙенең ғилми хеҙмәтендә олатайының тормош юлын өйрәнә.

– Ғабдулла Иҙелбаевты Әх­мәтзәки Вәлиди үҙенең “Хәти­рәләр”ендә бик йылы телгә ала, – тине ул үҙ сығышында.

Тамырҙарын ныҡлы белгән ил ҡоромаҫ. Йәш быуындың үҙ шәжәрәһен генә өйрәнеп ҡалмай, башҡа билдәле шәхестәрҙе лә ете быуынына тиклем өйрәнеүе, бының хаҡта ғилми-тикшеренеү эштәре яҙып, фәнгә, тарихҡа яҡын тороуы киләсәккә ҙур өмөт, ышаныс уята.