Йәшәйешебеҙ сағылдырылған

Шуныһы ҡыҙыҡлы: фотография нин­дәйҙер бер мәлде генә “эләктереп ала” һәм иҫтәлеккә ҡалдыра. Ошо сифаты ме­нән ул бик ҡиммәтле. Әйт­кәндәй, Өфөләге “Урал” галереяһында Александр Данилов менән Алик Хәсәновтың фоторәсемдәр күргәҙмәһе эшләй. Ундағы эштәрҙе ҡа­рағас, үрҙә әйтелгән һүҙҙәрҙең дөрөҫлөгөнә тағы бер тапҡыр инанаһың.

Александр Данилов үҙенең фотоларын “гәзит эштәре” тип атай. Ҡасандыр фотограф “Башҡортостан” гәзите редакция­һында ла эшләгәйне. Хәҙер ул – “Баш­ҡортостан ҡыҙы” журналы фоторәссамы.

– Александр фотоларында һәр ҡатын-ҡыҙҙың үҙенә генә хас һыҙаттарын аса. Уның ошондай оҫталығы һоҡландыра. Хатта ауылда саҡта ла беҙ күрмәгән әйберҙәрҙе фотоларында сағылдыра. Фоторәссамды ижади эштәре журна­лы­быҙ биттәрен биҙәй. Унһыҙ баҫмабыҙ сыға ла алмаҫ ине, – тине күргәҙмәне асыу тантанаһында “Башҡортостан ҡыҙы” жур­налының баш мөхәррире Гөлназ Ҡотоева.

Тормош нисек бар, шулай һынлан­дырыла Александр Даниловтың эштә­рендә. Уларҙа Башҡортостаныбыҙҙың гүзәл тәбиғәт мөйөштәрен, ил һәм республика сәхнә йондоҙҙарының концерттарынан һәм тормошобоҙҙоң башҡа өлкәләренән төшөрөлгән фотография­ларҙы күрергә мөмкин.

Ә Алик Хәсәновтың фотоларында, нигеҙҙә, пейзаж, натюрморт һәм портреттар. Ҡасандыр үҙе менән бергә эшләгән хеҙмәттәштәре лә уларҙа сағылыш тапҡан.

Ике фоторәссам, тормошҡа ике төрлө ҡараш. Уларҙың ижади эштәрендә бар йәшәйешебеҙ һынландырылған.