Рухи байлыҡ өлгөләре йәшәйәсәк

— Күңел йыуанысыма әүерелде был шөғөл, — ти Иҫке Йәнбәк ауылында йәшәгән Йәмилә Рамаҙанова. — Егермеләп кенә йорто булған ауылда донъя көтәбеҙ. Элек баш ҡалала йәшәһәм дә, ошо тыныс төбәкте үҙ итеүемә бик ҡәнәғәтмен. Өс йыл элек, мауығып китеп, һүрәт төшөрә башланым. Бөгөнгө күргәҙмәлә лә бер нисәүһе ҡуйылған.

Бәләкәй ауылда эш юҡ, үҙ хужа­лығыбыҙ менән йәшәйбеҙ. Улдарыбыҙ үҫеп, егет ҡорона инеп килә. Ҡул эштәре менән шөғөлләнеү өсөн форсат тыуып ҡына тора. Бәләкәйҙән һыбай йөрөргә күнеккәс, ат образы күңелемә яҡын, шуға күрә һүрәттә­ремдең күбеһе тап ошо малҡайға арналған. Стәрлетамаҡ ҡалаһында биҙәү-ҡулланма сәнғәт һөйөүселәр конкурсында быйыл рәсем буйынса беренсе урынды яуланым. Милли биҙәүестәр серҙәрен дә үҙләштерә башланым, оҫталарҙан өйрәнәм.

Донъяла модалар үҙгәреп торһа ла, нескә зауыҡ, күңел һалып эш­ләнгән биҙәүестәр, милли кейемдәр һаман да ылыҡтырғыс, һаман да һоҡланғыс. Ошондай алтын ҡуллы ҡатын-ҡыҙ оҫталар барында миллә­тебеҙҙең рухи байлыҡ өлгөләре йә­шәйәсәк, аҫыл ҡиммәттәре, һөнәрҙәре быуындан быуынға хеҙмәт итәсәк әле.