Күңел йыуанысына әүерелгән шөғөл

– Бынан биш йыл элек күңел ҡушыуы буйынса башҡорт ҡатын-ҡыҙҙарының боронғо кейемдәре, биҙәүестәре, шөғөлдәре менән таныша, өйрәнә башланым, – ти ауылдың ағинәйе. – Заманында ашнаҡсы ла, урам йыйышты­рыу­сы ла булдым, башҡа төрлө һөнәрҙәрҙе лә үҙләштерҙем. Хаҡлы ялға сыҡҡас, халҡыбыҙҙың ижады, матур биҙәүестәр эшләү серҙәрен үҙләштереү теләге көсәйҙе.

Башҡорт халыҡ ижадын һаҡлауға ҙур өлөш индергән, “Урал батыр” сәсәндәр мәктәбе етәксеһе, Башҡортостандың атҡаҙанған мәҙәниәт хеҙмәткәре Асия Ғәйнуллина үткәргән оҫталыҡ дәрестәрендә ҡатнашып, үҙенә фекерҙәштәр, әхирәттәр таба ул. Өфөләге “Селтәр” ойошмаһына йөрөп, ҡашмау эшләү нескәлектәрен өйрәнә.

– Милли кейемдәребеҙҙе кейеп, биҙәүестәребеҙҙе тағып әхирәттәрем менән театрҙарға йөрөйбөҙ. Бына һеҙҙең алдығыҙҙа үҙ ҡулдарым менән эшләгән һаҡал, быныһы – селтәр, хәситә. Оҡшаймы? Олоғайған көндә шундай мауыҡтырғыс шөғөлгә юлыҡтым, был “сир”ҙән ҡотолор әмәл юҡ, – тип йылмая Гүзәл Искәндәрова.

Ҡырмыҫҡалы районы.